२९ जेठ २०८३, शुक्रबार
सुनसरीको इटहरी उपमहानगरपालिकाले विद्युतीय बस सेवा सञ्चालन गर्ने भएको छ । नगर क्षेत्रमा सहुलियत सेवा शुरू गर्ने उद्देश्यले चार वटा बस खरिद गरिएको नगरप्रमुख हेमकर्ण पौडेलले जानकारी दिए ।
यसले स्थानीय नागरिकलाई यात्राका लागि सहज हुने उनले विश्वास व्यक्त गरे। इटहरीका चारवटै क्षेत्रलाई समेट्नेगरी रुट तय गर्ने काम भइरहेको उनले बताए ।
सम्भवतः आगामी असोज १ गतेबाट सेवा सञ्चालन हुने उनको भनाइ छ । उपमहानगरका इञ्जिनियर रुपेश आचार्यले छ करोड ३६ लाख ८६ हजार रुपैयाँ लागतमा बस खरिद गरिएको बताए । उनले भने, 'बसमा जीपीएस जडान, सीसी क्यामेरा, एसीलगायतका अन्य सुविधाको व्यवस्थापन गरी सूचना प्रविधिमैत्री बनाइएका छन् ।'
नगर बस सञ्चालनका लागि कार्यपालिका बैठकले वडा नं ६ का अध्यक्ष दिवस पोखरेलको संयोजकत्वमा समिति बनाएर काम गरिरहेको छ ।
