२२ जेठ २०८३, शुक्रबार
भक्तपुरकाे लोकन्थली बसपार्कमा एक महिलाले लगाएको सुनको सिक्री लुटपाट घटनामा संलग्न भएको आरोपमा प्रहरीले तीन जनालाई पक्राउ गरेको छ । गत साउन २१ गते बिहान ११ बजे रामेछापकी कमला गौतमले लगाएको एक तोलाको सुनको सिक्री लुटपाट भएको थियो ।
काठमाडौं उपत्यका अपराध अनुसन्धान कार्यालयका अनुसार पक्राउ पर्नेमा काभ्रेपलाञ्चोकको तिमालका खनक भन्ने अनिलकुमार तामाङ, नमोबुद्धका गणेश लामा र बेथानचोकका रोहित भन्ने सुरेश तामाङ छन् ।
यो समूह लोकन्थली बसपार्कबाट गौतमको सिक्री लुटपाट गरेर फरार भएकाे थियाे । अनुसन्धान कार्यालयका प्रवक्ता एसपी काजीकुमार आचार्यका अनुसार पक्राउ परेमध्येका अनिल यसअघि २०७१ जेठ १ गते पक्राउ परी अभद्र व्यवहार मुद्दामा कारबाही भोगेका अभियुक्त हुन् ।
त्यस्तै गणेश २०७५ मंसिरमा २६ मा, २०७६ पुस ७ मा, २०७९ कात्तिक २१ मा र गत साउन ४ गते प्रहरी वृत्त नयाँ बानेश्वरबाट अभद्र मुद्दा चलाइएका अभियुक्त रहेको प्रहरीले जनाएको छ ।
अर्का आरोपी सुरेश पनि पटके अभियुक्त हुन् । उनी यसअघि २०७८ कात्तिक ७ गते प्रहरी वृत्त बौद्धबाट, २०७८ भदौ ३० मा, २०७८ साउन ८ मा र २०७९ भदौ २६ मा प्रहरी वृत्त गौशालाबाट अभद्र व्यवहारमा मुद्दा चलेका अभियुक्त रहेको जानकारी प्रवक्ता आचार्यले दिए ।
