राष्ट्रिय स्वतन्त्र पार्टी (रास्वपा)का सभापति एवं पूर्वगृहमन्त्री रवि लामिछानेले सरकारीमा भएको आर्थिक अनियमितताको जिम्मा जीबी (गीतेन्द्रबाबु) राईले लिनुपर्ने बताएका छन् ।

सहकारी संस्थाको बचत रकम दुरुपयोग सम्बन्धमा छानबिन गर्न गठित संसदीय समितिले शुक्रवार लिएको बयानमा लामिछानेले यस्तो बताएको समितिका सभापति सूर्य थापाले जानकारी दिए ।

लामिछानेले आर्थिकसम्बन्धी सबै जिम्मा गोरखा मिडिया नेटवर्कका अध्यक्ष राईले लिने गरेको बताउँदै ‘सहकारी ठगीबारेको सबै कुरा जीबी राईलाई नै थाहा होला’ भनेका थिए ।

समितिले रास्वपा सभापति लामिछानेसँग बयान लिइरहेको छ ।

संसद् सचिवालय सिंहदरबारमा शुक्रवार अपरान्हबाट समितिले उनीसँग बयान लिइरहेको हो । 

गोरखा मिडिया नेटवर्कले सञ्चालन गरेको ग्यालेक्सी टीभीको प्रबन्ध निर्देशकको हैसियतमा लामिछानेसँग समितिले बयान लिएको हो ।

गोरखा मिडियाकै पूर्वसञ्चालक छविलाल जोशी बञ्जाडेसँग समितिले शुक्रवार झण्डै पाँच घण्टा लामो बयान लिएको थियो । 

लामिछानेसँग सोध्नका लागि समितिले तीन दर्जन लिखित प्रश्नावली तयार गरेको छ । बयान अझै दुई घण्टासम्म चल्ने बताइएको छ ।

अधिकांश प्रश्न व्यक्तिको नाममा सहकारीबाट ऋण लिएर टेलिभिजनमा लगानी गर्न मिल्छ ? भनेर सोधिएको छ । 

बयानका लागि सभापति लामिछाने केही फाइल बोकेर संसदीय समितिको बैठकमा प्रवेश गरेका थिए ।

लामिछाने गोरखा मिडिया नेटवर्कको प्रबन्ध निर्देशक र सञ्चालक रहेको समयमा विभिन्न सहकारीबाट ग्यालेक्सी टीभीमा लगानी भएको थियो ।

पोखराको सूर्यदर्शन, बुटवलको सुप्रिमलगायत सहकारीबाट रविको नाममा ऋण प्रवाह भएको थियो । लामिछाने उपप्रधान तथा गृहमन्त्री रहेको समयमा नेपाली कांग्रेसले सहकारी ठगीमा उनको संलग्नताबारे छानबिनको माग गरेपछि संसदीय छानबिन समिति गठन भएको थियो ।

तीन महिनाको समय पाएर जेठ १५ गते गठन भएको संसदीय समितिले सहकारी सञ्चालकको बयानसँगै प्रतिवेदन लेखनको काम पनि गरिरहेको छ ।

भदौ १५ भित्रै प्रतिवेदन तयार गर्ने गरी काम भइरहेको समितिका सभापति थापाले बताएका छन् ।