सहकारी ठगीसम्बन्धी संसदीय छानबिन विशेष समितिले तयार पारेको प्रतिवेदनमा हस्ताक्षर भएको छ ।

समितिले तीन महिना लगाएर विभिन्न २९ वटा सहकारीमा भएको अरबौं रुपैयाँ अपचलनको विषयमा गरेको अनुसन्धानपछि तयार भएको प्रतिवेदनमा हस्ताक्षर भएको हो । 

हस्ताक्षर भएको प्रतिवेदन सभामुख हुँदै संसदमा प्रस्तुत गर्ने तयारी भएको छ ।

६६ वटा बैठक बसेर सघन छलफल, तथ्यांक केलाएर प्रतिवेदन तयार गरेर कार्यान्वयनको लागि संसद हुँदै सरकारलाई बुझाउन लागिएको जानकारी थापाले दिए । 

दोषीलाई अपराधका निम्ति भागीदार बनाउने, सुझाव, निष्कर्ष र सिफारिससहितको १८ परिच्छेदको प्रतिवेदन तयार भएको थापाले बताए ।

‘अपचलन, ठगीका अनेक प्रवृत्तिको बारेमा छलफल गरेका छौं । अन्तरक्रिया गरेका छौं । काठमाडौं, बाहिर, कारागारबाट बोलाएर छलफल गर्‍यौं । प्रधानमन्त्रीसँग पछि छलफल गर्‍यौं । ६६ वटा बैठक गर्दै हामीले साढे तीन महिना नहुँदै प्रतिवेदन तयार गरेका छौं । यो प्रतिवेदन आजै प्रतिनिधिसभामा प्रस्तुत हुन्छ,' उनले भने ।

समितिले सहकारीको करोडौं रकम गोर्खा मिडियामा ल्याउने क्रममा जीबी राई र यसको खर्च गर्दा प्रबन्ध निर्देशकका रुपमा रवि लामिछाने दोषी रहेको ठहर गरेको छ । यसैले समितिले रविसहित ९ जनालाई कारवाही गर्न सिफारिस गरेको छ ।

समितिका सभापति सूर्य थापाले संसदमा सहकारीको रकम गोर्खा मिडियामा ल्याइएपछिको अपचलनमा रवि दोषी रहेको प्रतिवेदन संसदमा प्रस्तुत गर्दै रविलाई कारवाहीको सिफारिस गरेका हुन् । 

समितिले सुप्रिम, सूर्यदर्शन, स्वर्णल लक्ष्मीसहितका सहकारीबाट गोर्खा मिडियामा एक अर्ब हाराहारी आएको र यसको खर्च गर्नमा रविको प्रत्यक्ष संलग्नता रहेको भन्दै कारवाहीको लागि सिफारिस गरेको हो । 

थापा सभापति समितिमा दिलेन्द्रप्रसाद बडू, ईश्वरी न्यौपाने, लेखनाथ दाहाल, शिशिर खनाल, ध्रुवबहादुर प्रधान र सरिता भुसाल सदस्य छन् । समितिले तीन महिना एक हप्ता छलफल गरेर प्रतिवेदन तयार गरेको हो ।