३१ जेठ २०८३, आइतबार
रुपन्देहीको बुटवलमा सञ्चालित पशु बधशालाको मासु मात्र बिक्री गर्न उपमहानगरपालिकाले मासु पसलहरूलाई कडाइ गरेको छ । बुटवल उपमहानगरले लामो समयदेखि मासुजन्य वस्तु (खसीबोका) बधशालामा मात्रै बध गरेको बिक्री–वितरण गर्नुपर्ने निमय लागूसमेत गरेको छ । सोहीअनुसार समय–समयमा सचेत गराए पनि व्यवसायीले अटेर गरेपछि उपमहानगर कारबाहीमा उत्रिएको छ ।
बिहीवार विभिन्न सातवटा मासु पसलको अनुगमन गर्दा आफूखुसी काटेर बिक्री गरेको पाइएपछि १०–१० हजार रुपैयाँ जरिवाना गरिएको छ । स्वच्छ मासु मात्रै बिक्रीका लागि पटक–पटक आग्रह गर्दासमेत अटेरी गरेपछि जरिवाना गरिएको नगरपालिकाका पशु विकास शाखा प्रमुख झविन्द्रप्रसाद बन्जाडेले जानकारी दिए ।
बुटवल मिट सप्लायर्स, ज्योति माइला मासु पसल, सापकोटा मासु पसल, न्यू पहाडिया मासु पसल, भान्जा मासु पसल, बन्जाडे मासु पसल र पहाडिया मासु पसललाई जरिवाना गरिएको शाखा प्रमुख बन्जाडेले बताए । अनुगमनलाई उपमहानगरले निरन्तरता दिने बताउँदै पहिलोपटक भएर बधशालाको मासु नबेच्नेलाई १० हजारमात्र जरिवाना गरिएको उनले बताए ।
‘दोस्रोपटक २५ हजार र तेस्रो पटक अनुगमन गर्दा पनि बाहिर बध गरेको मासु बिक्री गरेको भेटिए ५० हजार जरिवाना हुनेछ,’ उनले भने, ‘त्यसपछि पनि बधशालाको मासु बिक्री नगरिए पसल नै बन्द गरिने छ ।’
बुटवल उपमहानगर बुटवलवासीको स्वास्थ्यप्रति विशेष संवेदनशील रहेको बताउँदै बधशालामा बध गरिएको मासु मात्रै बिक्री–वितरण गर्न र वध गरिएको मासु मात्रै उपभोग गर्न आग्रह गरेको छ ।
