बागलुङको बडिगाडमा श्रीमान्‌श्रीमती मृत फेला परेका छन् ।

जिल्लाको बडिगाड गाउँपालिका–१० निगलपानीका २२ वर्षीय जीवन परियार र उनकी श्रीमती १९ वर्षीया सन्ध्या परियार आफ्नै घरमा मृत फेला परेका हुन् ।

बिहीबार साँझ सँगै खाना खाएर सुतेका उनीहरू मृत भेटिएका हुन् ।

गाउँलेले प्रहरीलाई खबर गरेपछि शव उठाएर बुर्तीवाङ प्राथमिक स्वास्थ्य केन्द्रमा परीक्षणका लागि पठाइएको जिल्ला प्रहरी कार्यालय बागलुङका प्रहरी निरीक्षक केशव थापाले जानकारी दिए ।

दुई वर्ष अगाडि विवाह गरेको परियार दम्पतीको एउटा छोरी रहेको उनको भनाइ छ ।

अहिलेसम्म के भएर मृत्यु भएको पत्ता नलागेको भन्दै अनुसन्धान गरिरहेको प्रहरी निरीक्षक थापाले बताए ।

उनले भने, 'श्रीमान् पोखरामा काम गर्नुहुँदो रैछ, केही दिन अगाडि आउनुभएको रहेछ, साँझ घरमा सँगै खाना खानुभएको रहेछ, केही खाना बाँकी रहेको देखियो, घटना कसरी भयो, अहिलेसम्म पत्ता लागेको छैन, हामीहरूले अनुसन्धान गरिरहेका छौं ।'