२३ जेठ २०८३, शनिबार
नेपाल टेलिकमले कर्णाली प्रदेशको जुम्ला जिल्लाको पातारासी गाउँपालिकामा मोबाइल सेवा विस्तार गरेको छ । पातारासी गाउँपालिका-२ मा नयाँ साइट निर्माण गरी आइतबारदेखि टुजी/फोरजी मोबाइल सेवा सञ्चालन गरिएको हो।
जिल्लाको अति विकट पातारासी गाउँपालिकामा नेपाल टेलिकमले मोबाइल सेवा सञ्चालन गरेसँगै उक्त गाउँपालिकाका वडा नं. १, २ र ३ अन्तर्गतका गडीगाउँ, तल्फीगाउँ, माताचौरगाउँ, छुमचौरगाउँ लगायतका नागरिक पहिलो पटक दूरसञ्चार सेवाबाट लाभान्वित भएका छन् ।
दूरदराजका क्षेत्रमा दूरसञ्चार सेवा पुर्याउने कार्यलाई उच्च प्राथमिकतामा राख्दै कम्पनीले उक्त स्थानका ग्राहकहरूको मागलाई लक्षित गरी भोइस तथा डेटा सेवाको विस्तार गरेको टेलिकमका प्रवक्ता हरि ढकालले बताए ।
यससँगै यस भेगका स्थानीयवासी, घुम्न आउने पर्यटक तथा यस क्षेत्रका पर्यटन लगायत अन्य व्यवसायीहरूले आधुनिक दूरसञ्चार सेवाको प्रयोग गरी लाभ लिन सक्ने प्रवक्ता ढकालले बताए ।
