गोरखा मिडिया नेटवर्कको प्रबन्ध निर्देशक रहेको समयमा सहकारी संस्थासँगको कारोबारमा अनभिज्ञ रहेको भन्ने राष्ट्रिय स्वतन्त्र पार्टी (रास्वपा) सभापति रवि लामिछानेको दाबी खण्डित हुने जिल्ला सरकारी वकिलको कार्यालयले निष्कर्ष निकालेको छ ।

लामिछानेविरुद्ध आइतबार कास्की जिल्ला अदालतमा सहकारी ठगीसहितका ३ कसुरमा दायर गरिएको अभियोजन पत्रमा प्रबन्ध निर्देशकको रूपमा लामिछानेले आपराधिक दायित्व ब्यहोर्नु पर्ने दाबी गरिएको छ । 

‘... निज सञ्चालक रहेको गोरखा मिडिया नेटवर्क प्रालिको सरकारी संस्थासँगको कारोबारको विषयमा आफू अनभिज्ञ रहेको विषय खण्डित हुने देखिन्छ । यी प्रतिवादी गोरखा मिडिया नेटवर्क प्रालिमा अपचलन भइ गएको रकममा आपराधिक दायित्व ब्यहोर्नु पर्ने...’ अभियोजन पत्रमा उल्लेख छ (हेर्नुहोस् अभियोजन पत्रको अंश) ।

सहकारी ठगीको अनुसन्धानका लागि लामिछाने कात्तिक २ गतेदेखि प्रहरी हिरासतमा छन् । उनीविरुद्ध आइतबार मात्र जिल्ला अदालतमा मुद्दा दायर भएको छ । 

अभियोजन पत्रका सहकारी ठगीमा लामिछानेको संलग्नता पुष्टि हुने भन्दै ३ करोड ३९ लाख बिगो मागदाबी गरिएको छ ।