ओखलढुंगाको सुनकोशी गाउँपालिका–३, सिस्नेरीमा एक युवक मृत अवस्थामा फेला परेका छन् । शनिबार दिउँसो २३ वर्षीय देवबहादुर थापा झुण्डिएको अवस्थामा मृत भेटिएका हुन् । 

उनी काठमाडौंको गौशाला पिंगलास्थानस्थित होटलमा मृत फेला परेकी सुस्मिता खड्कासँगै बसेर फरार भएका व्यक्ति भएको हुन सक्ने प्रहरीले जनाएको छ । 

‘सुनकोशी गाउँपालिका–३, सिस्नेरीमा देवबहादुर थापा नाम गरेका २३ वर्षीय युवक झुण्डिएको अवस्थामा फेला परेका छन् । गौशाला घटनासँग जोडिएका देवबहादुर यिनै हुन् या अरु नै हुन् भन्ने विषयमा थप अनुसन्धान भइरहेको छ’, जिल्ला प्रहरी कार्यालय ओखलढुंगाका डीएसपी कृष्ण खड्काले भने । 

सुस्मिता बुधबार काठमाडौं महानगरपालिका–९ गौशालास्थित, बागमती होटलको कोठा नम्बर ३०८ मा मृत भेटिएकी थिइन् । उनीसँगै होटलमा बसेका देवबहादुर थापा नाम गरेका २३ वर्षीय युवक भने फरार थिए । प्रहरीले उनको खोजी तीब्र पारेको थियो । 

देवबहादुर जापानबाट गत मंसिर ३० गते मात्र नेपाल आएका थिए । विगत ३ वर्षदेखि जापानमा बसेका देवबहादुरको सुस्मितासँग प्रेम सम्बन्ध रहेको आफन्तले प्रहरीलाई बताएका छन् । 

सुस्मिताको हत्या नै भएको प्रहरीले निष्कर्ष निकालेको छ । कागेश्वरी मनोहरा नगरपालिकास्थित आलापोट घर भएकी सुस्मिता बसेको होटलको कोठा बुधबार अबेरसम्म नखोलेपछि होटल सञ्चालकले प्रहरीलाई खबर गरेका थिए । प्रहरी र स्थानीयको रोहवरमा ढोका खोल्दा सुस्मिता मृत अवस्थामा भेटिएकी थिइन् ।