२९ असार २०८३, सोमबार
पूर्वउपराष्ट्रपति नन्दबहादुर पुन सक्रिय राजनीतिमा आउन चाहेका छन् । त्यसका लागि उनले उपराष्ट्रपति हुनुअघि सक्रिय रहेको माओवादी र सो पार्टीका अध्यक्ष प्रचण्डसँग जिम्मेवारी मागेपनि अलमल भइरहेको छ ।
पार्टीभित्रै उनलाई राजनीतिमा सक्रिय गराउन नहुने आवाज उठेपछि जिम्मेवारी दिन समस्या भइरहेको बताइन्छ ।
मंगलबार बसेको पार्टीको पदाधिकारी बैठकमा पनि पुनलाई जिम्मेवारी दिनेबारे विवाद भएको छ । विवादकै कारण यस सम्बन्धमा कुनै निर्णय हुन नसकेको एक नेताले बताए ।
उनी माओवादीको बैठकहरूमा आमन्त्रित सदस्यका रूपमा कात्तिक अन्तिम सातादेखि सहभागी हुँदै आएका छन् । तर, जिम्मेवारीको सन्दर्भमा विवाद देखिएकाले मंगलबारको बैठकबाट कुनै निष्कर्ष निकाल्न नसकिएको हो ।
उसो त केन्द्रीय समितिको पुस २१ देखि २३ सम्म बैठकमा पनि उनी सहभागी भएका थिए । उपमहासचिव हरिबोल गजुरेलले आजको बैठकमा पुनलाई जिम्मेवारी दिने विषयमा कुनै निर्णय नभएको बताए ।
यस्तै बैठकमा केही प्रदेशमा जिम्मेवारी हेरफेर गर्नेबारेमा पनि छलफल भएको गजुरेलको भनाइ छ। तर सबै विषयमा अर्को बैठकबाट टुंगो लगाइने बताइएको छ ।
