२१ असार २०८३, आइतबार
१३ वर्षअघि एक ट्याक्सी चालकको हत्या गरेको आरोप लागेका काभ्रेका बाबु लामा पक्राउ परेका छन् ।
काभ्रेको साविक भुग्देउँ महाँकाल गाविस-७ हाल बेथानचोक गाउँपालिका-६, सिउँरानीका ३६ वर्षीय लामालाई प्रहरीले यही फागुन २८ पक्राउ गरेको हो ।
काठमाडौं उपत्यका अपराध अनुसन्धान कार्यालयबाट खटिएको टोलीले उनलाई पक्राउ गरेको हो ।
२०६६ मंसिर २६ गते राति १२:३० बजेतिर बा १ ज ९१४ नम्बरको ट्याक्सी चालक काभ्रेको साविक महादेवटार गाविस-९ हाल रोशी गाउँपालिका-४ लेम्बाबेसी २५ वर्षीय मेघबहादुर तामाङलाई ठमेलबाट कोटेश्वर जानुछ बाबुको समूहले लगेको थियो ।
त्यसपछि उनीहरूले भक्तपुर मध्यपुर ठिमी नगरपालिका– १६, स्थित नरेफाँट लगि ट्याक्सीमा सवार चार जनाले घाँटीमा गलबन्दीले कसी खुट्टा बाँधी उनको हत्या गरेका थिए । हत्यापश्चात उनीसँग भएको नगद र मोबाइल समेत लुटपाट गरेको घटनामा लामा भक्तपुर जिल्ला अदालतबाट दोषी ठहर भएका व्यक्ति हुन् ।
२०७८ भदौ ३ गतेको फैसलाले उनलाई २० वर्ष कैद ठहर भएको थियो । फरार उनलाई विशेष सूचनाका आधारमा झापाको मेचीनगर नगरपालिका-६ काँकडभिट्टा क्षेत्रबाट पक्राउ गरिएको अपराध अनुसन्धान कार्यालयका एसपी काजी कुमार आचार्यले जानकारी दिए ।
