सर्लाही सदरमुकाम मलंगवा–९ स्थित बालमन्दिर चोकको ताज गेष्ट हाउसमा भारतीय महिलाको शव फेला परेको छ । भारतको राजधानी दिल्लीस्थित उत्तरपूर्वी सुदामापुरीकी २८ वर्षीय आरती कुमारी बुधवार दिउँसो  गेष्ट हाउसको कोठामा पासो लगाएको अवस्थामा मृत भेटिएकी हुन् ।

गेष्ट हाउसका कर्मचारीहरूले बिहान १० बजे खाना खाएपछि कोठामा गएकी आरती लामो समयसम्म बाहिर ननिस्किएपछि शंका गर्दै झ्यालबाट हेर्दा झुण्डिएको अवस्थामा फेला पारेपछि प्रहरीलाई खबर गरेका थिए ।

अनुसन्धानका क्रममा प्रहरीले थाहा पाएको अनुसार हरिवन नगरपालिका–११ का सेराज नामक व्यक्तिले चैत्र ११ गते गेष्ट हाउसको कोठा नं. १०९ आफ्नो नाममा बुक गरी ती महिलासँग बस्दै आएका थिए । प्रत्यक्षदर्शीका अनुसार, सेराज नामक व्यक्ति पछिल्ला तीन दिनदेखि आरतीलाई भेट्न गेष्ट हाउस आइरहेका थिए र उनी आज बिहान पनि महिलासँग भेटेर फर्किएका थिए ।

प्रहरीले घटनास्थलबाट आरतीको लेखिएको सुसाइड नोट समेत फेला पारेको छ। विवाहिता आरती दिल्लीबाट मलंगवा किन आइन् र मो. सेराजसँगको सम्बन्ध के थियो भन्नेबारे थप अनुसन्धान भइरहेको प्रहरीले जनाएको छ । प्रहरीले घटना संकास्पद रहेकाले गम्भीरताका साथ अनुसन्धान गरिरहेको जनाएको छ ।