०९ साउन २०८३, शनिबार
रुपन्देहीको प्रहरी चौकी हाटी बनगाई दुर्गौलियामा कार्यरत प्रहरी नायब निरीक्षक खिमबहादुर खड्का घुस रकमसहित पक्राउ परेका छन् ।
उनलाई अख्तियार दुरुपयोग अनुसन्धान आयोगको कार्यालय, बुटवलबाट खटिएको टोलीले पक्राउ गरेको हो ।
सई खड्काले भारतबाट रुपन्देहीको दुर्गौलिया नाका हुँदै भन्सार छली अवैध रूपमा घरायसी प्रयोजनका सामान ल्याउन सहजीकरण गरिदिने भनी सेवाग्राहीसँग घुस लिएको आयोगले जनाएको छ ।
पीडितको सूचना एवं उजुरी निवेदनका आधारमा पुगेको आयोगको टोलीले सई खड्कालाई सेवाग्राहीबाट ३० हजार रूपैयाँ घुस लिइसकेको अवस्थामा उक्त रकमसहित पक्राउ गरेको जनाइएको छ ।
उनलाई रुपन्देहीको मायादेवी गाउँपालिका-६ बाट बिहीबार नियन्त्रणमा लिई थप अनुसन्धान भइरहेको आयोगका प्रवक्ता राजेन्द्र कुमार पौडेलले जानकारी दिए ।
