१० साउन २०८३, आइतबार
नेकपा एकीकृत समाजवादी मोरङको नवौं जिल्ला अधिवेशन भोलि मंगलबारदेखि विराटनगरमा शुरू हुँदैछ । बुधबारसम्म चल्ने अधिवेशनले ९१ सदस्य जिल्ला कमिटी चयन गर्नेछ ।
अध्यक्ष पदका लागि तीन जना नेता दाबेदार देखिएका छन् । चन्द्रवीर राई, उद्धव पोख्रेल र दीपक ढकाल अध्यक्षको दाबेदार देखिएका हुन् ।
राई वर्तमान अध्यक्ष हुन् भने पोखरेल उपाध्यक्ष हुन् । ढकाल भने प्रदेश कमिटीका सदस्य हुन् । अहिलेसम्म केन्द्रीय अध्यक्ष माधव नेपालको आशीर्वाद तीनवटै नेतालाई नदेखिएको एक नेताले बताए ।
‘राईलाई माथिल्लो कमिटीमा लैजाने चर्चा चलेको छ, तर कुन कमिटीमा राख्ने भन्ने टुंगो लागेको छैन । पोखरेल र ढकालमध्ये जसलाई अध्यक्ष नेपालको आशीर्वाद मिल्छ, उसैले बाजी मार्ने हो’, ती नेताले भने ।
उपाध्यक्षमा पनि तीन जना आकांक्षी देखिएका छन् । भुपाल बस्नेत, वीरेन्द्र यादव र विन्दुकला राई आकांक्षी देखिएका छन् । बस्नेत पार्टीको बेलबारी नगर कमिटीका अध्यक्ष हुन् भने यादव विराटनगर महानगर कमिटी अध्यक्ष हुन् ।
सचिवमा भने धेरै नेता आकांक्षी देखिएका छन् । कार्यालय सचिव प्रेमराज भारती, ध्रुव डाँगी, प्रदेश कमिटी सदस्य राजेन्द्र सुवेदी, महानगर कमिटी उपाध्यक्ष कविराज घिमिरे र पथरी नगर कमिटी अध्यक्ष तुलसी ढकालले इच्छा व्यक्त गरेका छन् । उपसचिवमा भवानी धमलाको चर्चा रहेको छ।
यो पार्टी फुटेपछिको पहिलो जिल्ला अधिवेशन हो । नेकपा एमालेसँगै जोडेर एसले पनि नवौं जिल्ला अधिवेशन भनेको छ । पहिले २०३ सदस्यीय आयोजक कमिटी रहेको थियो । अधिवेशनमा ५८८ जना प्रतिनिधि छनोट भएका छन् ।
अधिवेशन उद्घाटनमा भने नेकपा एस मोरङले शक्ति प्रदर्शन गर्ने जनाएको छ । उद्घाटन अगाडि पार्टी कार्यालय तीनपैनीबाट जुलुस निकालेर गणतन्त्रका पक्षमा नारा लगाउँदै कार्यक्रमस्थल होटल मनास्लु इनमा पुग्ने नेताहरूले जनाएका छन् ।
उद्घाटन अवसरमा कम्युनिस्ट आन्दोलनमा योगदान दिएका व्यक्तिलाई सम्मान गरिने र विभिन्न व्यक्तिको पार्टी प्रवेश कार्यक्रम पनि रहेको नेकपा एकीकृत समाजवादीले जनाएको छ ।
अधिवेशनको उद्घाटन केन्द्रीय अध्यक्ष नेपालले गर्ने कार्यक्रम रहेको मोरङका अध्यक्ष चन्द्रवीर राईले बताए । महासचिव घनश्याम भुसाल लगायतका नेताले पनि अधिवेशनमा सम्बोधन गर्ने कार्यक्रम रहेको नेताहरूले जनाएका छन् ।
