२१ असार २०८३, आइतबार
दैलेखको ठाटीकाँध गाउँपालिका–१, सिराडी ग्वालिपिन्नबाट गएराति अपहरणमा परेकी स्थानीय बमबहादुर बुढाकी तीन महिने छोरी श्रीयासहित प्रहरीले एक जनालाई पक्राउ गरेको छ ।
शिशु लिएर भाग्दै गरेको अवस्थामा चामुण्डाबिन्द्रासैनी नगरपालिका– २, को लामीडाँडा जंगलबाट अन्दाजी २० वर्षीय महिलालाई प्रहरीले नियन्त्रणमा लिएको हो ।
जंगलमा भाग्दै गरेको अवस्थामा स्थानीय र प्रहरीले ती महिलालाई नियन्त्रणमा लिएका इलाका प्रहरी कार्यालय दुल्लुका प्रमुख श्याम अर्यालले जानकारी दिए ।
उनका अनुसार पक्राउ परेकी महिला सिरवल भन्ने ठाउँकी शर्मिला विष्ट हुन् । सामाजिक सञ्जालमा सार्वजनिक भिडियोमा ती महिलाले उक्त शिशु घरबाट आफूले नल्याएको बताएकी छिन् ।
‘दुल्लुका तीन जना (पुरुष)ले बच्चा ल्याएका हुन्, मलाई चामुण्डाकै माथि डाँडामा दिएर उनीहरू नास्ता लिन बुडेली गएका थिए,’ शर्मिलाले भिडियोमा भनेकी छिन् ।
साथै उनले खर/परालमा आफूले आगो नलगाएको पनि बताएकी छिन् ।
गएराति ९ बजेतिर बमबहादुरको परिवार घरमा सुतेको अवस्थामा घर पछाडिको रुखमा राखेको खरमा आगो लागेको थियो ।
उक्त आगलागीबारे बमबहादुरको परिवारलाई छिमेकीले जानकारी दिएका थिए ।
त्यसपछि बमबहादुर र उनकी श्रीमती छोरा-छोरीलाई सुतिरहेकै अवस्थामा घरमा छाडेर आगो निभाउन गएका थिए । ‘उनीहरू घर फर्किँदा छोरी भेटिइनन्,’ बमबहादुरका दाजु दीपकले भने, ‘खोजी गर्दा कतै भेटिएन । हामीले पराल/खरमा आगो लगाएर हामीलाई उता अल्मल्याएर कोही व्यक्तिले लगेर भागेको शंका लाग्यो ।’
त्यसपछि ठाटीकाँध प्रहरीमा खबर गरिएको उनले बताए । प्रहरी र स्थानीयले खोजी थालेका थिए ।
शुक्रबार बिहान ९ बजेतिर छिमेकी चामुण्डाबिन्द्रासैनी नगरपालिकाको लामीडाँडामा बच्चा बोकेर भाग्दै गरेको अवस्थामा उनलाई पक्राउ गरिएको प्रहरीले जनाएको छ ।
