जिल्ला प्रशासन कार्यालय पर्साले आइतबार मध्यरातदेखि वीरगञ्ज महानगर क्षेत्रमा जारी गरिएको कर्फ्यू हटाएको छ।

पर्साका प्रमुख जिल्ला अधिकारी गणेश अर्यालले आइतबार राति १२ बजेदेखि कर्फ्यू हटाइएको जानकारी दिए । 

‘वीरगञ्ज महानगरभित्र समग्र शान्ति सुरक्षाको अवस्था विश्लेषण गर्दा परिस्थिति क्रमशः सुधार हुँदै गएको र सम्बद्ध पक्षहरूसँग सर्वपक्षीय बैठकमा भएको निर्णयका आधारमा उक्त कर्फ्यू आदेशलाई निरन्तरता दिनुपर्ने आवश्यकता नरहेको देखिएकाले राति १२ बजेदेखि हटाउने निर्णय गरिएको हो’, प्रजिअ अर्यालले भने । 

तर, अवस्था पूर्णरूपमा सामान्य नभएको भन्दै वीरगञ्ज महानगर पूर्वतर्फ बाइपास रोड, पश्चिमतर्फ सिर्सियापुल, उत्तरतर्फ गण्डक चोक र दक्षिणतर्फ शङ्कराचार्य गेटसम्मका क्षेत्रभित्र आज सोमबारदेखि १ गतेदेखि अर्को आदेश नभएसम्म कुनै किसिमको भेला, सभा, जुलुस तथा प्रदर्शन गर्न नपाउने गरी स्थानीय प्रशासन ऐन, २०२८ को दफा ६ (३ क) अनुसार निषेधाज्ञा आदेश जारी गरिएको छ।

प्रजिअ अर्यालले निषेधाज्ञा आदेशको उल्लंघन गर्नेलाई नियन्त्रणमा लिई कानुनअनुसार कारबाही गरिने स्पष्ट पारेका छन्।

शनिबार बेलुका वीरगञ्जमा दुई समूहबीच झडप भएपछि सोही दिन बेलुका ६:३० बजेदेखि कर्फ्यू आदेश जारी गरिएको थियो।