२१ जेठ २०८३, बिहीबार
नेपाल शिक्षक महासंघसँग सत्तारुढ दल नेकपा एमाले र नेपाली कांग्रेसका प्रमुख सचेतकले विद्यालय शिक्षा ऐन जारी गर्ने प्रतिबद्धता जनाउने भएका छन् ।
करिब एक महिनादेखि काठमाडौं केन्द्रित शिक्षकहरूको आन्दोलन अन्त्य गर्न दलका प्रमुख सचेतकले ऐन जारी गर्ने प्रतिबद्धता जनाउने भएका हुन् । त्यति मात्र होइन सरकारले समेत आजै बस्ने मन्त्रिपरिषद् बैठकबाट शिक्षकका माग सम्बोधनका लागि महत्त्वपूर्ण निर्णय गर्नेछ ।
जसका लागि अहिले सिंहदरबारबाट शिक्षा, विज्ञान तथा प्रविधिमन्त्री रघुजी पन्त र गृहमन्त्री रमेश लेखक मन्त्रिपरिषद् बैठकका लागि बालुवाटार पुगेका छन् । शिक्षकसँग मोटामोटी सहमति जुट्ने स्थिति भएपछि उनीहरू मन्त्रिपरिषद् बैठकका लागि बालुवाटार पुगेका हुन् ।
एमाले प्रमुख सचेतक महेश बर्तौलाले धेरै कुरामा शिक्षकहरूसँग सहमति हुने बाटोमा रहेको बताए ।
‘हामी कांग्रेस र एमालेले शिक्षा ऐन जारी गर्न शिक्षक महासंघसँग प्रतिवद्धता जनाउँछौं । धेरै कुरामा शिक्षकहरूसँग सहमति हुने बाटोमा छौं । संसद्को पाटोबाट हामी गर्न सक्ने कुरामा प्रतिवद्धता जनाउने, मन्त्रिपरिषद्ले तत्काल गर्न सक्ने कुरा घोषणा गर्ने र शिक्षा विधेयक टुंगोमा पुर्याउने एउटा प्रतिबद्धताको वरिपरि सहमतिको प्रयासमा छौं’, बर्तौलाले लोकान्तरसँग भने, ‘आजै राति मोटामोटी जुटेको सहमतिमा मन्त्रिपरिषद् बैठकले सहमति गर्नेछ । त्यसपछि संयुक्त रूपमा निर्णय सार्वजनिक गर्नेछौं ।’
विद्यालय शिक्षा ऐन जारी गर्नुपर्ने लगायतका माग राखेर देशभरका सामुदायिक विद्यालयका शिक्षक गत चैत २० गतेदेखि काठमाडौंमा सडक आन्दोलन गरिरहेका छन् ।
