नेकपा माओवादी केन्द्रले ‘हुलाकी मार्ग केन्द्रित ‘जनतासँग माओवादी : तराई–मधेश जागरण अभियान’ले राष्ट्रिय एकता सुदृढ गर्न महत्त्वपूर्ण योगदान दिएको निष्कर्ष निकालेको छ।​

शनिबार अध्यक्ष पुष्पकमल दाहाल ‘प्रचण्ड’को खुमलटारस्थित निवासमा बसेको केन्द्रको पदाधिकारी बैठकले अभियानको समीक्षा गर्दै अभियान माओवादी केन्द्रको मात्र नभई सम्पूर्ण राष्ट्रकै साझा अभियान बन्न सफल भएको निष्कर्ष निकालेको हो ।

बैठकले अभियानमा सक्रिय सहभागिता जनाएका तराई–मधेशका जनसमुदायप्रति आभार व्यक्त गर्दै धन्यवाद प्रस्ताव पनि पारित गरेको छ।

यस्तै, शनिबारको बैठकले आगामी जेठ २ गतेदेखि ‘मध्य पहाडी लोकमार्ग अभियान’ शुरू गर्ने निर्णय गरेको छ।

बैठकमा माओवादीप्रति बढ्दो जनविश्वास, आगामी अभियानको तयारी, कार्ययोजना र संगठन विस्तारका विषयमा पनि विस्तृत छलफल भएको पार्टीले जनाएको छ।