०९ असार २०८३, मंगलबार
इजरायली प्रधानमन्त्री बेन्जामिन नेतान्याहूले गाजामा सीमित मात्रामा खाद्यान्न पठाउन अनुमति दिएका छन् । इजरायलले मार्च २ देखि गाजामा खाद्य पदार्थ प्रवेशमा प्रतिबन्ध लगाएको थियो।
टाइम्स अफ इजरायलको रिपोर्टअनुसार इजरायलले आइतबार सैन्य अधिकारीहरूको सल्लाहमा यो निर्णय गरेको हो । तर, मन्त्रिपरिद्का धेरै मन्त्रीहरू यस निर्णयको विरुद्ध थिए ।
आन्तरिक सुरक्षा मन्त्री इटामार बेन ग्विर र अन्य दक्षिणपन्थी नेताहरूले निर्णयको आलोचना गर्दै यो हमासलाई अक्सिजन दिनुजस्तै भएको बताएका थिए । पहिले हमासलाई समाप्त पार्नुपर्ने उनको भनाइ थियो ।
इजरायलले मार्च २ मा गाजामा नाकाबन्दी लगाएको थियो । पछिल्लो साढे दुई महिनामा गाजामा संयुक्त राष्ट्र संघ र अन्य एजेन्सीहरूको खाद्यान्न भण्डार पूर्ण रूपमा समाप्त भएको छ । खाद्यान्नको अभावका कारण गाजामा भोकमरीको जोखिम बढेको छ ।
प्रतिवेदनअनुसार हाल गाजामा एक हप्ताको लागि सहायता प्रदान गरिनेछ । यस समयमा इजरायलले गाजामा खाद्यान्न वितरण गर्न नयाँ वितरण केन्द्रहरू निर्माण गर्नेछ । यी केन्द्रहरू इजरायली सेनाको निगरानीमा हुनेछन् ।
