२१ जेठ २०८३, बिहीबार
भारत उत्तर प्रदेशको हरदोई जिल्लास्थित अतरौली थाना क्षेत्रको मोहन खेडा मजरा पहाडपुर गाउँमा एक विवाह समारोहमा अनपेक्षित घटना घटेको छ ।
माला लगाउने क्रममा बेहुलाले बेहुलीलाई थप्पड हानेपछि माहोल बिथोलिएको हो । यस अपमानजनक घटनापछि रिसाएकी बेहुलीले विवाह तोड्ने निर्णय लिइन् र बेहुलासँग जान अस्वीकार गरिन् ।
जानकारी अनुसार, गंज भरावनबाट आएको जन्ती १४ डिसेम्बरमा ‘मुख्यमन्त्री सामूहिक विवाह योजना’अन्तर्गत पहिल्यै विवाह गरिसकेको थियो, तर त्यसबेला बिदाइ भएको थिएन । बिदाइ समारोह औपचारिक रूपमा सम्पन्न गर्न जन्ती फेरि बोलाइएको थियो ।
शुरूआतमै बेहुलाको कान्छा भाइ सतीशले बाजागाजालाई लिएर विवाद गर्न थालेपछि स्थिति तनावग्रस्त हुन पुग्यो । त्यो बेलामा कुरा मिलाउने प्रयास गरियो तर, माला साटासाट गर्ने बेला फेरि जन्तीहरूबीच झगडा शुरू भयो।
यहीबीच, रिसाएका बेहुलाले बेहुलीलाई थप्पड हाने जसले गर्दा सम्पूर्ण माहोल झनै बिग्रियो । घटनापछि बेहुलीका आफन्त र जन्तीहरूबीच कुटाकुट भयो जसमा सुरज, मुकेश, अशोक, सतीश र नैन्सीसहित करिब आधा दर्जन मानिस घाइते भए ।
सूचना पाएपछि प्रहरी घटनास्थलमा पुगेर स्थिति नियन्त्रणमा लिएको थियो ।
