नेपाली कांग्रेसका नेता मोहम्मद अफताव आलमलाई सफाइ दिने उच्च अदालत जनकपुरको वीरगञ्ज इजलासका न्यायाधीश खुसी प्रसाद थारूलाई कालो मसी छ्यापिएको छ ।

नेकपा बहुमत (धर्मेन्द्र बास्तोला) नेतृत्वका कार्यकर्ताले बिहीबार न्यायाधीश थारूमाथि इजलासमै मसी छ्यापेका हुन् ।

न्यायाधीशलाई कालो मसी छ्याप्ने ३ जनालाई नियन्त्रणमा लिइएको जिल्ला प्रहरी कार्यालय पर्साका प्रमुख, एसपी गौतम मिश्रले लोकान्तरलाई जानकारी दिए ।

सेवाग्राहीको भेषमा नेकपा बहुमतका कार्यकर्ता अदालत प्रवेश गरेर न्यायाधीशको इजलासमा पुगेका थिए ।

न्यायाधीश थारू र अर्जुन महर्जनको इजलासले जेठ १४  गते आलमलाई सफाइ दिने निर्णय गरेको थियो । 
 
२०६४ सालको निर्वाचनको पूर्वसन्ध्यामा भएको बम विस्फोटको घटनामा घाइते भएकालाई इँटा भट्टामा हालेर जलाएको आरोपमा आलम पक्राउ परेका थिए । 

जिल्ला अदालत रौतहटको आदेशले पुर्पक्षका लागि कारागारमा रहेका आलमलाई उच्च अदालतले सफाइ दिएको थियो । 

सफाइ दिएलगत्तै रिहा भएका आलम मष्तिष्कघात भएर अस्पताल भर्ना भएका थिए । आलमलाई सफाइ दिने न्यायाधीश थारू र महर्जन विवादमा परेका थिए । उनीहरूविरुद्ध न्याय परिषद्‌मा उजुरी समेत परेको छ ।