२३ जेठ २०८३, शनिबार
पतञ्जली जग्गा हिनामिना प्रकरणमा विशेष अदालतमा बयान दिन पुगेका नेकपा एकीकृत समाजवादीका अध्यक्ष एवं पूर्वप्रधानमन्त्री माधव नेपालको तर्फबाट बहस गर्न ११७ जना अधिवक्ताले वकालतनामा दर्ता गराएका छन् ।
अधिवक्ता परिवर्तन राईले बुधबार दिउँसो साढे १ बजेसम्म १ सय १७ जनाले नाम टिपाएको र यो बढ्ने क्रममा रहेको जानकारी दिए । बयानका लागि नेता नेपाल बिहान ११ बजे विशेष अदालत पुगेका थिए ।
नेता नेपालको बयान सकिएको र चिया ब्रेकपछि थुनछेक बहस हुने नेपालको तर्फबाट बहस गर्न उपस्थित वरिष्ठ अधिवक्ता खम्बबहादुर खातीले जानकारी दिए ।
वरिष्ठ अधिवक्ता शम्भु थापा, रमन श्रेष्ठ, गोविन्द बन्दी, गोपालकृष्ण घिमिरेलगायत पनि थुनछेक बहसमा सहभागी हुने तयारी गरेका छन् ।
पतञ्जलीलाई हदबन्दी भन्दा बढीको जग्गा राख्न तथा साटफेर गर्न दिँदा कानूनविपरीत निर्णय गराएको भन्दै अख्तियार दुरुपयोग अनुसन्धान आयोगले पूर्वप्रधानमन्त्री नेपालविरुद्ध जेठ २२ गते विशेष अदालतमा मुद्दा दर्ता गरेको थियो ।
अख्तियारको तर्फबाट वरिष्ठ अधिवक्ता सुशील पन्तले पनि बहस गर्ने भएका छन् ।
