२८ असार २०८३, आइतबार
मधेश प्रदेशका पूर्व प्रदेश प्रमुख राजेश अहिराज (झा)ले आफूलाई बलात्कार गरेको भनेर जाहेरी दिएकी युवतीविरुद्ध पनि मुद्दा दर्ता भएको छ ।
अहिराजको जाहेरीको आधारमा बुधबार काठमाडौं जिल्ला अदालतमा मुद्दा दर्ता भएको हो । ती युवतीमाथि आपराधिक लाभ (एक्सटर्सन)को कसुरमा मुद्दा दायर भएको छ ।
मेडिकल शिक्षाका लागि अध्ययन गर्न युवतीले पैसा मागेको, आफूले नदिएपछि धम्की दिएको र त्यसपछि उनको खातामा तीन लाख रूपैयाँ पठाइदिएको अहिराजको जाहेरीमा उल्लेख छ ।
युवतीकै जाहेरीका आधारमा मंगलबार मात्रै अहिराजविरुद्ध जबर्जस्ती करणी मुद्दा दर्ता भएको थियो । जसमा बुधबार जिल्ला अदालतमा थुनछेक बहस भयो । जिल्ला न्यायाधीश पिताम्बर शर्माको इजलासले उनलाई पुर्पक्षका लागि थुनामा पठाउन आदेश गरिसकेको छ ।
युवतीले भने सरकारी वकिलसँगको बयानमा आफूलाई अहिराजले २० लाखको चेक समेत देखाएको र मुद्दा फिर्ता गर भन्दा आफूले नमानेको उल्लेख गरेकी छन् ।
यसअघि झाले जिल्ला प्रहरी परिसर काठमाडौंमा आपराधिक लाभ (एक्सटर्सन)को जाहेरी दर्ता गराएको तर, त्यसमा प्रहरीले कुनै कारबाही अघि नबढाएको सरकारी वकिलसँगको बयानमा भनेका थिए ।
पीडित युवतीले भने २०८१ जेठ ४ गते आफू डेरामा बसिरहेका बेला अहिराजले कोही नभएको मौका छोपेर मुख थुनेर आफूलाई जबर्जस्ती करणी गरेको बयान दिएकी छन् ।
आफूलाई बलात्कार गर्दा अहिराजले ‘नेपालमा पैसा र पावर हुनेकै कानून छ, तँ मधेशी परिवारको छोरी होस्, यो कुरा बाहिर आयो भने मधेशी समाजले बहिष्कार गर्छ, तँ र तेरो परिवार कहीँ कतै मुख देखाउन लायक हुनेछैन’ भन्दै धम्की दिएको बयानमा उल्लेख गरेकी छन् ।
युवतीले आफ्नो अस्मिता लुटेर जिउँदो लास बनाउने अहिराजलाई हदैसम्मको कारबाही गरिपाऊँ भन्दै जाहेर दिएकी थिइन् ।
