२६ जेठ २०८३, मंगलबार
उदयपुरको उदयपुरगढी गाउँपालिका–७ स्थित मदन भण्डारी लोकमार्गमा सोमबार दिउँसो भएको सवारी दुर्घटनामा एक पैदल यात्रीको ज्यान गएको छ भने एक जना गम्भीर घाइते भएका छन्।
काठमाण्डौबाट सुनसरीतर्फ जाँदै गरेको प्रदेश ३–०१–००६ ख ०५६१ नम्बरको ट्रकले ठक्कर दिँदा रौतामाई गाउँपालिका–७ निवासी ७२ वर्षीय टंकबहादुर लामिछाने मगरको घटनास्थलमै मृत्यु भएको जिल्ला प्रहरी कार्यालय उदयपुरले जनाएको छ।
दुर्घटनामा ट्रकका सह–चालक गोमे दर्जी गम्भीर घाइते भएका छन्। दोलखा कालिन्चोक गाउँपालिका–४ निवासी ४० वर्षीय दर्जीको दाहिने खुट्टामा चोट लागेको प्रहरीले जनाएको छ। उनलाई उपचारका लागि जिल्ला अस्पताल उदयपुर ल्याइएको छ।
ट्रक चालक नवराज राउत (५४), बनेपा नगरपालिका–१४, काभ्रेपलाञ्चोक निवासी, सकुशल रहेका छन् र अहिले प्रहरीको नियन्त्रणमा रहेका छन्।
घटनापछि प्रहरी अधिकृतको टोलीले घटनास्थलमा पुगेर अनुसन्धान अघि बढाएको छ। मृतकको शव पोष्टमार्टमका लागि जिल्ला अस्पताल उदयपुरमा राखिएको छ।
