१० साउन २०८३, आइतबार
विश्व फुटबल महासंघ (फिफा)द्वारा जारी पछिल्लो महिला वरीयतामा नेपालले ठूलो फड्को मारेको छ । बिहीबार जारी नयाँ वरीयतामा नेपाल विगतको तुलनामा एकैपटक १३ स्थान माथि उक्लिएको हो ।
पछिल्लो फिफा वरीयतामा नेपाल ८७ औं स्थानमा आसिन छ । दक्षिण एसियाली राष्ट्रमा नेपालभन्दा अगाडि भारत मात्र छ । भारत पनि पछिल्लो वरीयताको तुलनामा सात स्थान माथि उक्लिएको छ । भारत पछिल्लो वरीयताको ६३ औं स्थानमा छ ।
दक्षिण एसियाली राष्ट्र बंगलादेशले पनि वरीयतामा महत्त्वपूर्ण प्रगति गरेको छ । बंगलादेश एकैपटक २४ स्थान माथि उक्लिएको छ । नयाँ वरीयतामा बंगलादेश १०४ औं स्थानमा छ । तीन स्थान माथि उक्लिएको अर्को दक्षिण एसियाली राष्ट्र पाकिस्तान १५४ औं वरीयतामा छ ।
यसैगरी, श्रीलंका भने विगतको तुलनामा दुई स्थान तल झरेको छ । नयाँ वरीयतामा श्रीलंका १६१ औं स्थानमा आसिन छ । आठ स्थान माथि उक्लिएको भुटान १६३ औं वरीयतामा छ । दुई स्थान तल झरेको माल्दिभ्स भने १६५ औं वरीयतामा छ ।
पछिल्ला महिला वरीयतामा अमेरिकालाई पछि पार्दै स्पेन पहिलो स्थानमा उक्लिएको छ । अघिल्लो वरीयतामा पहिलो स्थानमा रहेको अमेरिका दोस्रो स्थानमा झरेको छ । तीन स्थान माथि उक्लिएको स्विडेन तेस्रो स्थानमा आसिन छ ।
यसैगरी, एक स्थान माथि उक्लिएको इङ्ल्यान्ड चौंथो र दुई स्थान तल झरेको जर्मनी पाँचौं वरीयतामा आसिन छन् । एसियाली राष्ट्रमा भने जापान सबैभन्दा अगाडि छ । नयाँ वरीयतामा जापान आठौं स्थानमा छ । अघिल्लो वरीयताको तुलनामा जापान एक स्थान तल झरेको हो ।
