सामान्य विवादका कारण दुई दाजुभाइको निर्मम हत्या भएको छ । घटना २१ अगस्टको हो । पाकिस्तानको लाहौर नजिकैको रायविन्द शहरमा सामान्य विवादले डरलाग्दो मोड लिँदा दुई दाजुभाइको ज्यान गएको बीबीसी हिन्दीले जनाएको छ ।

रशिद र वाजिद नाम गरेका दुवै दाजुभाइको हत्या कुनै पारिवारिक झगडा वा लामो समयदेखिको विवादको परिणाम थिएनन् । स्थानीय फलफूल व्यापारीसँग ३० रुपैयाँका लागि विवाद हुँदा दुई दाजुभाइको ज्यान गएको समाचारमा उल्लेख छ । एक जनाको घटनास्थलमै मृत्यु भएको र अर्कोको उपचारको क्रममा ज्यान गएको हो । 

घटना कसरी भयो ?

२१ अगस्टको दिन दूधको व्यवसाय गर्ने राशिद र वाजिद नामका दाजुभाइ आफ्नो पसलमा दूध पुर्‍याएर घर फर्कँदै थिए। बाटोमा उनीहरू फलफूल किन्न रोकिए । त्यही बेला उनीहरूको भेट फलफूल बिक्रेता ओवैस र उसका भाइ तैमूरसँग भयो।

ओवैसले एक दर्जन केलाको मूल्य १३० रुपैयाँ बताए । तर, राशिदले आफ्नो हातमा १०० रुपैयाँ मात्र भएको बताए । उनीसँग बाँकी हजारका नोट थिए । फलफूल बिक्रेताले खुला ३० रुपैयाँ दिनुपर्ने अडान लिए । जुन कुरा राशिद दाजुभाइले मानेनन् । अनि ओवैसले ३० रुपैयाँको कुरा फिर्ता गर्न भने । 

शुरूमा सामान्य देखिएको विवाद छिट्टै भनाभनमा परिणत भयो । त्यसपछि तैमूरले गालीगलौज शुरू गरेको समाचारमा उल्लेख छ । 

यसपछि विवाद बढ्दै हिंसात्मक रूप लियो। आरोपअनुसार ओवैस र तैमूरसहित उनका केही साथीहरूले दुवै दाजुभाइमाथि लाठी र क्रिकेट ब्याट प्रयोग गरेर हमला गरे ।

घटनास्थलमा करिब २५० मानिस उपस्थित रहे पनि कसैले झगडा रोक्ने प्रयास नगरेको, बरू मोबाइलमा भिडियो खिचिरहेको देखिएको परिवारको गुनासो छ ।

मामलामा दर्ता भएको उजुरीका आधारमा प्रहरीले मुख्य आरोपी ओवैस र तैमूरलाई पक्राउ गरिसकेको छ । उनीहरूलाई अनुसन्धान अपराध नियन्त्रण विभाग (सीसीडी)लाई जिम्मा दिइएको छ । 

प्रहरी र परिवारले दुई दाजुभाइको हत्याको कारण केही मिनेटको झगडा र ३० रुपैयाँ भएको बताएको छ।

पीडितका पिता सईद इकबालले आफ्ना दुई छोराको ज्यान जम्मा ३० रुपैयाँमा गएको बताएका छन् । 'मेरो एउटा छोरा १५ रुपैयाँमा मर्‍यो, दुइटा ३० रुपैयाँमा मारिए । कसैले पनि मेरो छोरालाई जसरी मार्‍यो त्यसरी जनावरहरूलाई पनि मार्दैन । एक जना मान्छेले बारम्बार उनीहरूलाई क्रिकेट ब्याटले हिर्काइरह्यो र नजिकै उभिएका मानिसहरूले आफ्नो मोबाइल फोनबाट भिडियो बनाइरहे । यो कस्तो समाज हो ? कसैले पनि यसलाई रोक्ने प्रयास गरेनन् ।'

समाचार अनुसार पहिले दुवै दाजुभाइले मिलेर फलफूल बेच्नेलाई कुटेका थिए । त्यसपछि नजिकैका फलफूल मालिकहरूले फलफूल बेच्नेका भाइहरूलाई बोलाएका थिए । उनीहरू पनि आए र नजिकैका मालिकहरू पनि यसमा सामेल भए, त्यसपछि उनीहरूले दुवै दाजुभाइलाई कुटपिट गरे।

पछि आएका मानिसहरूले दुवै दाजुभाइलाई लाठीले कुटे, जसका कारण उनीहरूको टाउकोमा गम्भीर चोट लाग्यो र दुवैको मृत्यु भयो ।