२२ असार २०८३, सोमबार
नेपालमा सूचीकरण नभएका सामाजिक सञ्जाल बन्दको प्रक्रिया अघि बढेको छ ।
सञ्चार तथा सूचना प्रविधि मन्त्रालयको निर्देशन अनुसार नेपाल दूरसञ्चार प्राधिकरणले बिहीबार साँझ सबै सेवा प्रदायकलाई पत्राचार गर्दै सामाजिक सञ्जाल बन्द गर्न निर्देशन दिएको छ ।
प्राधिकरण स्रोतका अनुसार सञ्चार मन्त्रालयको निर्देशन अनुसार निर्णय गर्दै सेवा प्रदायकलाई निर्देशसहितको पत्र पठाइएको हो । उनीहरूलाई इमेलमार्फत् पत्राचार गरिएको प्राधिकरण स्रोतले जनाएको छ ।
यससँगै अब नेपालमा सूचीकरण हुन नआएका फेसबुक, युट्युब, इन्स्टाग्राम, व्हाटसएप, एक्स लगायतका २६ वटा सामाजिक सञ्जाल प्लेटफर्महरू बन्द (निष्क्रिय) हुने भएका छन् ।
बिहीबार सञ्चार मन्त्रालयमा बसेको बैठकले बिहीबारदेखि नै लागू हुनेगरि यी सामाजिक सञ्जाल प्लेटफर्मलाई निष्क्रिय पार्न नेपाल दूरसञ्चार प्राधिकरणलाई निर्देशन दिने निर्णय गरेको थियो ।
प्राधिकरणका अनुसार नेपालमा १०७ आईपीएस र दुई भ्वाइस अपरेटर सेवा प्रदायक छन् ।
यसअघि सरकारले सूचीकरण नभएका सामाजिक सञ्जाललाई नेपालमा सूचीकृत हुन अन्तिम पटकका लागि सात दिनको समय दिएको थियो । मन्त्रिपरिषद् बैठकबाटै निर्णय गरेर दिइएको उक्त समयावधि बुधबार गुज्रिएको थियो । तर, निर्धारित समयमा तोकिएका सामाजिक सञ्जाल प्लेटफर्मले सूचीकरणका लागि निवेदन नदिएपछि सरकारले निष्क्रिय पार्न लागेको हो ।
दर्ता भएका टिकटक र भाइबर भने बन्द हुने छैनन् ।
