काठमाडौं, २३ पुस– एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल  प्रचण्डबीच आइतबार वार्ता भएको छ ।  अध्यक्ष ओली निवास बालकोटमा २ घण्टा चलेको वार्तामा दुबै अध्यक्ष एकता प्रक्रियालाई टुंगोमा पुर्याउन सहमत भएका छन् । 
छलफलमा दुबै अध्यक्षले  एकता प्रक्रियालाई भाँड्न षड्यन्त्र भइरहेको भन्दै त्यसप्रति चनाखो बन्दै छिट्टै टुंगोमा पुग्नुपर्नेमा समेत जोड दिएका थिए । 
बैठकपछि माओवादी केन्द्रका अध्यक्ष प्रचण्डले एकता प्रक्रियालाई टुंग्याएर जाने सहमति भएको प्रतिक्रिया दिए । 
‘सरकारको  विषय र मुलतः पार्टी एकताका विषयमा छलफल भयो ।  जुन प्रक्रियामा  अघि बढेका छौं, त्यसलाई निश्कर्षमा पुर्याउने सहमति भएको छ’, प्रचण्डले बैठकपछि भने, ‘भोलि  एमाले र हाम्रो पार्टीको  बैठक बसि आन्तरिक छलफल गरेर पर्सी एकता संयोजन समितिको बैठक बस्छ।’
समितिको बैठकबाट वैचारिक राजनीतिक र सांगठनिक  विषय हल गर्न अर्को टीम बनाएर जाने पनि प्रचण्डले बताए । 
आजै चितवनबाट फर्किएका प्रचण्ड ओली भेट्न  साँझ ६ बजे बालकोट पुगेका थिए ।  
ओली बुधबार उपचारका लागि थाइल्याण्ड जाने भएकाले सो पार्टी एकताका विषयमा ठोस सहमति जुटाउन दुई अध्यक्ष प्रयासरत रहेको बताइएको छ । 

एमाले र माओवादी केन्द्रका नेताहरुले  सरकार गठन र पार्टी एकता सँगसँगै हुने बताउँदै आएका छन् ।
 तर, नेतृत्व, कार्यदिशालगायतका विषयमा सहमति जुट्न  नसक्दा ढिलाइ भइरहेको बताइन्छ ।