राष्ट्रिय स्वतन्त्र पार्टी (रास्वपा)को पहिलो महाधिवेशन चितवनको भरतपुरमा आइतबारदेखि जारी छ । 

महाधिवेशनमा जिल्ला, प्रवास र विभिन्न तहका कमिटीबाट करिब ४ हजार १०० प्रतिनिधि सहभागी छन् ।

ती प्रतिनिधिका लागि रास्वपाले खानपानको पूर्ण व्यवस्थापन गरेको छ । भोजन व्यवस्थापन उपसमितिका अनुसार प्रतिनिधिहरूलाई बिहानको नास्ता, बिहानको खाना, दिउँसो हाइटी र बेलुकाको रात्रिभोजको व्यवस्था गरिएको छ ।

बिहानको खानामा खसीको मासु र भातलाई मुख्य परिकार बनाइएको छ । बिहानको खानामा मात्रै दैनिक झण्डै ८ क्विन्टल खसीको मासु खपत हुने अनुमान गरिएको छ ।

बिहान र बेलुकाको खानामा कम्तीमा १० प्रकारका परिकारहरू समावेश गरिनेछ, जसमा जिरा राइस, दाल, तरकारी, अचार, सलाद र दही रहनेछन् ।

मासु नखाने (शाकाहारी) सहभागीका लागि पनिर र च्याउको छुट्टै व्यवस्था गरिएको छ भने साथमा मौसमी तरकारी पनि राखिनेछ । बेलुकाको खानामा भने ‘मिक्स भेज’ तरकारी खुवाइने जनाइएको छ ।

रास्वपाले खानपान व्यवस्थापनको जिम्मेवारी चितवनको क्षेत्रपुरस्थित दियालो फुडल्याण्डलाई दिएको छ ।