बुटवल, २५ माघ– गुल्मीका प्रदेशसभा सांसद सुर्दशन बरालले एक सातादेखि बुटवलका विभिन्न ठाउँमा डेरा खोजे । प्रदेशसभाको पहिलो बैठक हुनुभन्दा दुई दिन अगाडि बुटवल आएर कोठा खोज्दा उनले २० हजार रूपैयाँभन्दा कम भाडामा फ्ल्याट पाउन सकेनन् । 

त्यसपछि उनी बेलबासमा डेरा लिने निचोडमा पुगे । ‘तीन/चार दिनदेखि मिलनचोक, सुख्खानगर र देवीनगरलगायतका ठाउँमा कोठा हेर्न गए, २० देखि २५ हजार रूपैयाँसम्म हो भन्छन्’ उनले भने, ‘एउटा ३ वटा कोठासहितको फ्ल्याट चाहिने । २०/२५ हजार भन्दा कममा दिन सकिँदैन भन्छन्, घर धनी ।’

उनले २५ हजार रुपैयाँ भाडा तिरेर बुटवलमा सांसद बस्न नसक्ने बताए । अन्य प्रदेश राजधानीमा सांसदहरूलाई विभिन्न छुट दिएका छन् । यहाँ भने राजधानी भएपछि घरधनीले कोठा भाडासमेत बढाए ।’
बर्दियाकी एमाले सांसद कस्नी थारू पनि बुटवलमा कोठा भाडामा लिने सोंचमा छिन् । बर्दियादेखि संसद् बैठकमा आउन जान सम्भवन नहुने भएपछि उनी कोठा भाडामा लिने सोचमा पुगेकी हुन् ।

‘एक/दुई ठाउँमा कोठाको बारेमा बुझेको किचन र कोठालाई मात्र १० हजार रूपैयाँसम्म भन्न भ्याए । त्यति महंगो भाडा कसरी तिर्न सकिन्छ ?’ थारूले भनिन् । राप्ती, भेरी र लुम्बिनी अञ्चल मिलेर बनेको ५ नम्बर प्रदेशमा रूपन्देहीबाहेक अन्य जिल्लाका सांसदहरू कोठा भाडामा खोज्न थालेका छन् । 

५ नम्बर प्रदेशमा रुपन्देहीका १८, नवलपरासीका ६, पाल्पाका ८, अर्घाखाँचीका ४, गुल्मीका ४, कपिलवस्तुका १२, दाङका १०, प्युठानका ४, बाँकेका १०, बर्दियाका ६, रोल्पाका २ र रुकुमका ३ गरी ८७ सांसद छन् । 
नयाँ ठाउँको वातावरण र संसद् दुवै सांसदहरूलाई नौलो लागेको छ । आफूहरु गाउँले परिवेशबाट आएकोले संसद् भवनमा छिर्दा नौलो अनुभूति भएको थारुले प्रतिक्रिया दिइन् ।

बर्दियाकी माओवादी केन्द्रकी सांसद लौती थारूलाई पार्टीले समानुपातिकबाट सांसद बनाए पनि अहिले उनलाई बुटवलमा कसरी भाडामा लिएर बस्ने चिन्ता छ । उनी शपथ ग्रहणको लागि माघ ६ गते बुटवल आइन् । ७ गते सपथ ग्रहण गरेर त्यसै दिन बर्दिया फर्किन् । २१ गतेको पहिलो बैठकका लागि २० गते राति बुटवल आइन् । २१ गते बुटवलको पहिलो प्रदेशसभा बैठठक सकेर उनी बर्दिया फर्किँदै छन् । 

राष्ट्रियसभा निर्वाचनमा मत राख्न दाङ रहेकी उनले भनिन्, ‘बुटवलमा डेरा खोज्न थालेको पाउनै मुस्किल भो । बुधबार हुने राष्ट्रिय सभा निर्वाचनका लागि दाङ आएकी छु । घर (बर्दिया ठाकुरबाबा–५) पुगेर लगत्तै बुटवल आएर कोठा खोज्ने हो । तर,महंगो रहेको धेरै साथीहरूबाट सुनेकी छु ।’ बर्दियाका सबै सांसदहरूले सकेसम्म एकै ठाउँमा डेरा खोज्ने तयारी भएको थारूले जानकारी गराइन् । 

राष्ट्रिय जनमोर्चाकी प्यूठानबाट प्रतिनिधत्व गर्ने सांसद तारा जिसीले पार्टी कार्यकर्ताहरूलाई डेरा खोज्न निर्देशन दिएकी छन् । उनले भनिन्, ‘पहिलोपटक सांसद भइएको छ । बुटवलमा डेरा भाडामा लिएर बस्ने खान सकिएलाजस्तो छैन । सबै क्षेत्रमा महंगी छ ।’ सांसदहरू पहिलो बैठक सकिएपछि आ–आफ्नो गृह जिल्लातर्फ फर्केका छन् । फागुन २ गते हुने अर्को सभामुखको निर्वाचन हुने गरी अर्को बैठक बस्दै छ ।