०३ असार २०८३, बुधबार
काठमाडौं, १६ फागुन — न्युजील्यान्ड भ्रमणमा रहेको इंग्ल्यान्डले बुधवार माउन्ट माउनगानुईमा सम्पन्न दोस्रो एकदिवसीयमा ६ विकेटको विजय प्राप्त गरेको छ ।
टस जितेर फील्डिङ रोजेको इंग्ल्यान्डले न्युजील्यान्डलाई ४९.४ ओभरमा २२३ रनमा सीमित गरिदिएको थियो । जवाफमा इंग्ल्यान्ड ३७.५ ओभरमा चार विकेट गुमाएर २२५ रन बनाउन सफल भयो ।
इंग्ल्यान्डलाई जीत दिलाउनका लागि बेन स्टोक्सको प्रमुख भूमिका रह्यो । उनले आठ ओभरमा ४२ रन दिएर दुई विकेट लिए अनि ७४ रनमा ६३ रन पनि बनाए ।
स्टोक्सको ६३ रनबाहेक कप्तान इयन मोर्गनको ६२, जोनी बेयरस्टोको ३७ र जोसेफ बटलरको ३६ रनको पनि इंग्ल्यान्डको जीतमा योगदान रह्यो ।
न्युजील्यान्डका लागि ट्रेन्ट बोल्टले दुई तथा लोकी फर्गुसन र कोलिन मुनरोले एक एक विकेट लिए ।
यसअघि ब्याटिङ गरेको न्युजील्यान्डका लागि मिचेल स्यान्टनरले ५२ बलमा ६३ रन, मार्टिन गुप्तिलले ५० अनि कोलिन डे ग्य्रान्डहोमले ३८ बनाए । जम्मा नौ रनमा दुई विकेट गुमाएको न्युजील्यान्डको नियमित रूपमा विकेट झर्दै गयो र मध्यम स्कोर मात्र बन्न सक्यो ।
ब्याट्स्म्यानहरूको तालमेल नमिल्दा तीनवटा रनआउट हुन पुग्यो ।
इंग्ल्यान्डका लागि स्टोक्सबाहेक क्रिस वोक्स र मोईन अलीले पनि दुई दुई विकेट लिए ।
पहिलो एकदिवसीयमा तीन रनले हारेको इंग्ल्यान्डले यो जीतसँगै शृंखला बराबरीमा ल्याएको छ । तेस्रो एकदिवसीय वेलिङटनमा फागुन १९ गते खेलिनेछ ।
