२१ जेठ २०८३, बिहीबार
धनगढी, फागुन २६– बोक्सीको आरोपमा कुटपिटबाट घाइते भएकी कैलालीको घोडाघोडी नगरपालिका–५ देउकलीकी राधा चौधरीको सेती अञ्चल अस्पतालमा उपचार भइरहेको छ । उनको स्वास्थ्य अवस्था बारे प्रदेश नम्बर ७ का भूमि तथा कृषि मन्त्री विनिता चौधरीले आज जानकारी लिएकी छिन् ।
बिहान अस्पताल पुगेकी मन्त्री चौधरीले उनको उपचार खर्च सरकारले बेहोर्ने बताइन । मन्त्री चौधरीले घटनाका दोषिलाई कारबाहीको दायरामा ल्याउने बताइन ।
यसैबीच आज बस्न लागेको प्रदेशसभाको बैठकमा पनि सांसदहरुले घटनाका बारेमा कुरा उठाउने बताए दोषिलाई कारबाहीका लागि बैठकमा कुरा उठाउने एक सांसदले जानकारी दिए ।
बिहीबार बोक्सी आरोपमा कक्षा १२ मा अध्ययनरत १८ वर्षीया चौधरीलाई मरणासन्न हुने गरी घण्टौंसम्म कुटपिट गरिएको थियो । कुटपिटबाट उनको शरीरका विभिन्न भागमा गम्भीर चोट लागेको छ । पेट, छाती, टाउको, खुट्टा, घाँटी, नाक, कानलगायत शरीरका अन्य भागमा चोट छन् ।
भोलेबाबा भनिने रामबहादुर चौधरीले बोक्सी भगाउने भन्दै उनीमाथि निर्मम कुटपिट गरेका हुन् । आफूलाई भोलेबाबा बताउने २५ वर्षीय रामबहादुरले बोक्सी भगाउने भन्दै कुटपिट गरिरहँदा भेला भएका सयौं स्थानीयमध्ये कसैले पनि नरोकेको पीडितका बुवा जोखन चौधरीले दुखेसो पोखे ।
बोक्सी आरोपमा कुटपिट गर्ने रामबहादुरलाई शुक्रबार प्रहरीले पक्राउ गरेको छ । उनीमाथि सार्वजनिक अपराधको मुद्दा चलाइएको छ ।
