काठमाडौं, १० चैत– हिजोबाट शुरु भएको नेपाली कांग्रेस केन्द्रीय समितिको बैठक आज पनि बस्ने भएको छ । बैठक बिहान ११ बजे पार्टी केन्द्रीय कार्यालय सानेपामा बस्न लागेको हो । 

नेताहरुले बोल्ने क्रम नसकिएकाले बैठक आज पनि बस्न लागेको हो । निर्वाचन समीक्षा र समसामयिक राजनीतिक विषयमा छलफल गर्न कांग्रेसले बैठक डाकेको हो । 

बैठकको पहिलो दिन बोलने नेताहरुले समसामयिक राजनीति र प्रदेश तथा प्रतिनिधिसभा निर्वाचनको परिणामबारे समीक्षा गरेका थिए । हिजोको बैठकमा पार्टीका नेताहरु कृष्णप्रसाद सिटौला, प्रकाशमान सिंह र नारायण खड्काले धारणा राखे । 

उनीहरुले पार्टी सभापति शेरबहादुर देउवाको कडा आलोचना गरेका थिए । निर्वाचन समीक्षा र समसामयिक राजनीतिक विषयमा धारणा राख्ने केन्द्रीय सदस्यहरुको सूची लामो भएकाले केन्द्रीय समिति बैठक केही दिन लम्बिन सक्ने नेताहरुले बताएका छन् ।