काठमाडौं, २० वैशाख–३३ किलो सुन प्रकरणको चर्चा चुलिएका बेला चुडामणि उप्रेती ‘गोरे’ समूहले नै पछिल्ला चार वर्षमा ३८ क्विन्टल सुन भन्सार छल्दै नेपाल भित्र्याएको तथ्यले राजस्व विभाग तथा गृह प्रशासन झसंग भएको छ ।

लामो समयदेखि प्रहरी अधिकृत, सुरक्षा गार्ड, विमानस्थलका कर्मचारी मिलेर बनेको गोरेको गिरोहले नेपालको एक मात्रै अन्तर्राष्ट्रिय विमानस्थलबाट यति ठूलो परिमाणमा सुन तस्करी गरेको तथ्य बाहिरिएको हो ।

३३ केजी सुन प्रकरणको छानबिन गर्न गठित समितिले विभिन्न स्थानबाट बरामद गरेका फाइलमा चार वर्षयता नेपालमा संगठितरूपमा सुन तस्करी गरिरहेका गोरेको योजनामा ४ सय २१ पटक विभिन्न परिमाणमा सुन तस्करी भएको खुलेको हो । साढे ४ वर्षमा झण्डै ३८ क्विन्टल सुन तस्करी भएको समितिको निष्कर्ष छ ।

जिल्ला  सरकारी वकिलको कार्यालयले बुधबार जिल्ला अदालत मोरङमा दायर गरेको मुद्दाको अभियोगपत्रमा ‘गोरे’को समूहले त्रिभुवन अन्तर्राष्ट्रिय विमानस्थल सुरक्षा गार्ड कार्यालयमा तत्कालीन समयमा कार्यरत प्रहरी नायव महानिरीक्षक गोविन्दप्रसाद निरौला, प्रहरी वरिष्ठ उपरीक्षक श्यामबहादुर खत्री, प्रहरी उपरीक्षक विकासराज खनाल, प्रहरी नायव उपरीक्षक सञ्जय राउत समेतलाई आर्थिक लाभ उपलब्ध गराई सुन चोरी पैठारी गरेको उल्लेख छ ।

यी प्रहरी अधिकृतले आफ्ना सरकारी कार्यकक्ष, साधन, स्रोत, जनशक्ति र फोर्सको लजिष्टिक लगायत ड्राइभर र व्यक्तिगत सुरक्षा गार्डलाई आपराधिक समूहको गतिविधिमा उपयोग गर्न दिएको अभियोगपत्रमा उल्लेख छ ।

साढे एक खर्बभन्दा बढी राजस्व गुम्यो

पछिल्लो चार वर्षमा गोरे समूहले अवैधरूपमा भित्र्याएको सो सुनबाट करीब साढे १ *अर्बभन्दा बढी राजस्व गुमेको छ ।

२०७० सालयता अवैधरूपमा भित्रिएको सो ३८ क्विन्टल (३ हजार ८ सय किलोग्राम) सुन तस्करीमार्फत् नेपाल भित्र्याउँदा प्रचलित भन्सार दरअनुसार १ अर्ब ५९ करोड ६० लाख बराबरको राजस्व छली भएको हो ।

प्रचलित भन्सार दरअनुसार अहिले एक किलोग्राम सुन भित्र्याउँदा ४ लाख २० हजार राजस्व तिर्नुपर्ने नेपाल सुन चाँदी व्यवसायी महासंघका अध्यक्ष मोहनकुमार सुनारले जानकारी दिए ।

उनले भने, ‘अहिले हामीले एक किलो सुन नेपाल ल्याउँदा ४ लाख २० हजार भन्सार तिर्छौं, सो दरअनुसार हिसाब गर्दा ३ हजार ८ सय किलोग्राम सुन नेपाल भित्रिँदा ठूलो राजस्व गुमेको छ ।’

*सच्याइएको