काठमाडौं, २१ बैशाख– सरकारले देशभरका सबै यातायात व्यवसायीलाई धमाधम फोन गर्न शुरु गरेको छ ।  यातायात व्यवसायीहरुको सवारी कहाँ छ ? के गर्दै छन्, आफ्नो सवारी कुन रुटमा पठाएका छन् भन्नेबारे जानकारी दिन यातायात व्यवस्था विभागले फोन गर्न शुरु गरेको हो । 

यातायात व्यवसायीले सकारविरुद्धको लडाइस्वरुप सार्वजनिक यातायात ठप्प पारेपछि सरकारले उनीहरुमाथि निगरानी बढाएको हो । विभागकाअनुसार समितिअन्तर्गत चलिरहेका सिण्डिकेटधारी यातायात व्यवसायी सबैलाई फोन गर्दै अहिलेको अवस्थाबारे जानकारी लिदै गाडी तत्काल सडकमा निकाल्न निर्देशन दिरहेको छ ।  

सरकारले तत्काल गाडी सडकमा ननिकाले सरकारी निर्णयअनुसार पक्राउ गर्न बाध्य हुने चेतावनी पनि दिइरहेको विभागले जनाएको छ ।  सरकारले धमाधम फोन गर्न थालेपछि बिहानदेखि ग्यारेजमा रहेका केही सवारीहरु मध्यान्हदेखि सडकमा गुड्न थालेका छन् ।  

गाडी थन्क्याएर बसेको व्यवसायीलाई सरकारले पक्राउ समेत गर्न थालेको छ ।  अहिलेसम्म देशभरीबाट आधा दर्जन बढी व्यवसायी पक्राउ परिसकेका छन् ।