२६ जेठ २०८३, मंगलबार
काठमाडौं– डाक्टर गोविन्द केसीका मागका सम्बन्धमा सरकार र केसी पक्षीय वार्ता टोलीबीच सहमति जुटेको छ । प्रधानमन्त्री निवास बालुवाटारमा बिहिबार अबेसम्म चलेको वार्तामा केसीका मागका सम्बन्धमा सबैजसो विषयमा सहमति जुटेको अधिवक्ता सुरेन्द्र भण्डारीले लोकान्तरलाई बताए ।
उनले भने, ‘वालुवाटारमा भएको वार्तामा सबैजसो विषयमा सहमति जुटेको छ । हामी सहमति बोकेर अनसनस्थल त्रिवि शिक्षण अस्पताल जाँदै छौं ।’ उनले डाक्टर केसीलाई सहमतिको बुँदा देखाएसँगै आजै राती अनसन तोडिने सम्भावना रहेको बताए ।
चिकित्सा शिक्षा सुधारको माग राख्दै १५ औ पटकको अनसनमा रहेका केसी र सरकारी वार्ता टोलीबीच यसअघि भएको भनिएको ९ बुँदे सहमतिमा पुन समस्या उत्पन्न भएको थियो ।
केसीले काठमाडौंमा १० वर्षसम्म मेडिकल कलेज खोल्न नपाइने बुँदालाई सहमति पत्रमा उल्लेख गर्नुपर्ने अडान लिएका थिए ।
त्यसपछि विवादित विषयमा सहमति जुटाउन बालुवाटारमा प्रधानमन्त्रीकै उपस्थितिमा वार्ता भएको थियो ।
