०३ असार २०८३, बुधबार
काठमाडौं — हतियार बनाउने रुसको सबभन्दा ठूलो कम्पनी कालाश्निकोभले बिहीवार नयाँ विद्युतीय कार सार्वजनिक गरेको छ ।
एके–४७ बन्दुक बनाउने यो कम्पनीको कार नयाँ प्रविधियुक्त हुनेछ र यसले एलन मस्कको टेस्ला कारलाई कडा चुनौती दिनेछ ।
नीलो रंगको यो कारको लूक पुरानो खालको छ । यसको नाम सीभी–१ राखिएको छ । सन् १९७० ताका चलेको इझ–कोम्बी कारबाट प्रभावित छ ।
एकचोटि चार्ज गर्दा यो कार ३५० किलोमिटर गुड्छ । कारको अधिकतम पावर ५०० किलोवाट छ । टेस्लाको मोडल ३ को अधिकतम पावर १५० किलोवाट छ ।
कारको टप स्पीड ५० माइल प्रतिघन्टा रहेको दाबी गरिएको छ । यसको तुलना टेस्ला मोडल ३ विद्युतीय कारसँग गर्दा त्यसको टप स्पीड १४० माइल प्रतिघन्टा छ ।
कारलाई १०० किलोमिटर प्रतिघन्टाको स्पीड पक्रनका लागि यो कारलाई जम्मा ६ सेकेन्ड लाग्छ भनी दाबी गरिएको छ ।
कम्पनीका अनुसार, यसमा क्रान्तिकारी इन्भर्टर प्रयोग गरिएको छ । यसले कारको ब्याट्रीलाई विद्युतीय अप्लायन्सेसमा पावर पु–याउन सहायता गर्छ ।
कारलाई तयार गरिँदैछ र यसको बिक्रीका बारेमा कुनै जानकारी छैन ।
यो फ्युचरिस्टिक विद्युतीय सुपरकार बनाउने कालाश्निकोभले विद्युतीय मोटरबाइक पनि बनाउने गरेको छ ।
एजेन्सी
