११ साउन २०८३, सोमबार
काठमाडौं–पार्टी एकतापछि पहिलो पटक शनिबार हुन लागेको नेपाल कम्युनिस्ट पार्टी (नेकपा)को चियापान कार्यक्रमको सबै तयारी करिब पूरा भएको छ । नेकपाका नेता कृष्णगोपाल श्रेष्ठका अनुसार तयारीका बारेमा बुधबार पार्टीका महासचिव विष्णु पौडेल, स्थायी कमिटी सदस्य योगेश भट्टराई सहितका केही नेताहरुले चियापान हुने स्थान भृकुटीमण्डपको निरीक्षण समेत गरेका छन् ।
विजयादशमी, दीपावली, नेपाल सम्बत तथा छठको अवसरमा आयोजना हुन लागेको चियापान कार्यक्रमका लागि करिब ५० हजार जनालाई निमन्त्रणा वितरण गरिएको नेता श्रेष्ठले बताए । उनकाअनुसार कात्तिक १० गते मध्याह्न १२ देखि ५ बजेसम्म चियापानको कार्यक्रम तय भएको छ ।
३ बजेसम्म पार्टी नेता, कार्यकता तथा सर्वसाधारणका लागि र ३ बजेदेखि ५ बजेसम्म नेपालस्थित कूटनीतिक नियोगका प्रमुख, राजनीतिक दलका शीर्ष नेताहरु, संवैधानिक अङ्गका प्रमुखलगायतलाई आमन्त्रण गरिएको श्रेष्ठले बताए । तीनसय बढी स्वयम्सेवक परिचालन गरिने चियापान कार्यक्रमको सबै तयारी पूरा भएको नेता श्रेष्ठले जानकारी दिए ।
चियापानमा करिब ४० हजारको सहभागिता रहने पार्टीको विश्वास छ । चियापानमा राष्ट्रपति, उपराष्ट्रपतिसहित पूर्व प्रधानमन्त्रीहरुलाई समेत आमन्त्रण गरिएको छ । यस्तै शनिबार हुने चियापान कार्यक्रममा नेत्रविक्रम चन्ददेखि सीके राउतसम्मलाई निम्तो दिएको छ ।
नेकपा स्थायी कमिटीका सदस्य देवेन्द्र पौडेलले नेकपाका महासचिव नेत्रविक्रम चन्द विप्लवदेखि छुट्टै मधेस देश निर्माणको आन्दोलन गरिरहेका स्वतन्त्र मधेस गठबन्धनका नेता सीके राउतलाई निम्तो गरिएको बताए । तर, पार्टीले आयोजना गरेको चियापानमा नागरिकको हैसियतमा रहेका पूर्वराजा ज्ञानेन्द्र शाहलाई निम्ता दिईएको छैन । यद्यपि, शाही कालका मन्त्री एवं नेताहरुलाई भने निम्ता दिइएको छ ।
