०२ साउन २०८३, शनिबार
काठमाडौं– नेपाल कपडा उद्योग संघले विभिन्न माग राख्दै मुलुकभरका कपडा उद्योग बन्द गरेको छ । सरकारले विगतमा कपडा उद्योगीलाई मुल्य अभिवृद्धि कर (भ्याट) छुट दिँदै आएको थियो । तर, आर्थिक ऐनमार्फत् सरकारले भ्याट छुटको व्यवस्था हटाएको छ ।
ऐनमा रहेको र विगतमा पाउँदै आएको भ्याट छुटको व्यवस्था हटाएपछि उद्योग संघले आगामी शनिवारसम्मका लागि मुलुकभरका २ सय ५० बढी कपडा उद्योग बन्द गर्ने निर्णय गरेको हो ।
संघले आफ्ना लागि वैकल्पिक व्यवस्था नगरी सरकारले भ्याट छुटको व्यवस्था हटाएकोले कपडा उद्योग सञ्चालन गर्न अप्ठ्यारो भएको भन्दै सांकेतिक आन्दोलन स्वरुप कपडा उद्योग बन्द गर्ने बताएको छ । संघका अध्यक्ष शैलेन्द्रलाल प्रधानले सरकारको नारा समृद्धिको भए पनि नारा अनुसार काम नगरेको बताए । उनले विगतमा आफूहरुले पाउँदै आएको भ्याट छुट पाउनुपर्ने भन्दै पटक पटक सरकारको ध्यानाकर्षण गराए पनि सरकारले वेवास्ता गरेको बताए ।
अहिले सांकेतिक रुपमा एक हप्ताका लागि कपडा उद्योग बन्द गरेको र आगामी दिनमा समेत आफुहरुका माग सम्बोधन नगरे कडा आन्दोलनमा उत्रिने चेतावनी अध्यक्ष प्रधानले दिए ।
संघले भ्याट छुटको प्रावधान हटाएपछि सो बराबरको रकम नगद अनुदानमा पाउनु पर्ने, उद्योगले नयाँ मेसिन खरिद गर्दा ३० प्रतिशत नगद अनुदान पाउनुपर्ने लगायतका माग सरकार समक्ष राखेका छन् ।
त्यस्तै पाँच प्रतिशत ब्याजदरमा कर्जा उपलब्ध गराउनुपर्ने, विद्युत् महसुलमा ५० प्रतिशत छुट हुुनुपर्ने, उद्योगको मेसिनरी तथा पार्टस् खरिदमा लाग्ने भन्सार छुट हुनुपर्ने लागतयका माग संघले राखेको छ । त्यसैगरी उद्योगीले खरिद गर्ने डाइज र केमिकलमा भन्सार छुट पाउनु पर्ने, निर्यातमा १० प्रतिशत अनुदान पाउनु पर्ने र श्रमिकको भुक्तानीमा नगद अनुदान दिनुपर्ने माग राखेका छन् । आफ्ना मागहरुका सम्बन्धमा सरकारले आगामी शनिवारसम्म कुनै पनि सुनुवाइ नगरे कडा आन्दोलनमा उत्रिने संघले चेतावनी दिएको छ ।
नेपाली कपडा उद्योगमा १० अर्ब रुपैयाँ बराबरको लगानी रहेको र सयौंको संख्यामा नेपालीले नै रोजगारी पाएको समेत उद्योगीहरुको दावी रहेको छ ।
