कञ्चनपुर–जनतालाई सुविधा दिने तहमा पुगे पछि जनप्रतिनिधि आफ्नै तलब भत्ता, सेवा सुविधा बढाउने तर्फ उन्मूख हुन थालेपछि चौतर्फी आलोचित हुन थालिरहेको अवस्थामा कञ्चनपुर जिल्लाको पुनर्वास नगरपालिका वडा नं. १ का वडा अध्यक्ष प्रतापबहादुर चन्दले भने सुविधामा दिएको मोटरसाइकल लिन अस्वीकार गरेका छन् ।

चन्द तत्कालिन एमालेबाट वडा अध्यक्षमा निर्वाचित भएका थिए । गत आ.ब २०७५÷७६ को नगरसभाले ११ वटै वडा अध्यक्षलाई मोटरसाईकल खरिद गर्न भनी ३५ लाख विनियोजन गरेको थियो । उक्त रकम लगभग एउटा पुरै वडाको विकास बजेट जतिकै भएको हुँदा जनप्रतिनिधि सुविधाभोगी हुनु नहुने भन्दै नगरसभामा आपत्ति जनाएका थिए । विनियोजित कार्यक्रम अनुसार नगरपालिकाले दशैंको अवसर यमाहाको एस.जेड.आर. १५० सि.सि. मोटरसाईकल खरिद गरि वडा अध्यक्षहरुलाई वितरण गरेको थियो । तर वडा अध्यक्षले भने मोटरसाईकल नलिई उक्त रकले आफ्नो वडामा पानी फिल्टर वितरण गर्ने योजना बनाएका छन् । 

आफ्नो वडाको भकुण्डा भन्ने गाउको २३ घरधुरीको धारामा अत्याधिक आरसेनिक भेटिएको र बर्षौदेखि स्थानीयवासी त्यही दुषित र जोखिमयुक्त पानी पिउन बाध्य भएका कारण आफुले यो योजना बनाएको वडा अध्यक्ष चन्द बताउँछन् । संविधान कार्यान्वयन गर्ने पहिलो निकाय भनेकै स्थानीय तह हो । नागरिकको बाँच्न पाउने अधिकारलाई सुनिश्चत गर्न मोटरसाईल बराबर मूल्यको उक्त बस्तीमा ‘बायो स्याण्ड फिल्टर’ मार्फत पानी वितरण गर्ने चन्दले बताए । ‘तराईको ४२–४३ डिग्री गर्मीमा मजदुरी गरि छाक काटेर संकलन भएको करबाट मोटरसाईकल चढ्नु भनेको गरिब नगरवासीको ढाडमा चढ्नु हो’ चन्दले बताउँछन् । यस क्षेत्रमा बसोबास भएको ४८ वर्ष बन्दा बढी भए पनि अहिले आएर फिल्टर पाए पछि आफुहरुले शुद्ध पानी खान पाउने भएकोमा स्थानीयबासी हर्षित भएको छन् । वडा अध्यक्ष चन्दको यो कमदको भने चौतर्फी प्रशंसा हुन थालेको छ ।