२२ जेठ २०८३, शुक्रबार
वीरबहादुर राना
जुम्ला — इन्टरनेटको दुनियाँसँग जोडिने गरी कर्णाली प्रदेशको जुम्ला जिल्ला सिँजा गाउँपालिकामा नेपाल टेलिकम (एनटीसी) को टावर सञ्चालनमा आएको छ ।
भौगोलिक विकटताका कारण पहिले टेलिकमको सेवा सुचारु हुन नसकेको भएपनि अहिले भने सिँजा गाउँपालिकाको पहलमा पाँच करोड रुपैयाँ लगानीमा एनटीसीको टावर सञ्चालनमा आएको हो ।
गाउँपालिका अध्यक्ष देवलसिंह रावलले समग्र नागरिक, उपभोक्ता तथा सर्वसाधारणको सहजता र हितका लागि सञ्चार सुविधा प्रदान गर्नका लागि पहल र जोड गरिएको अनि त्यो अहिले आएर पूरा भएको बताए ।
‘लामो समयदेखि सूचना र सञ्चार प्राप्ति गर्न लागि तीव्र प्रतीक्षामा रहेका सिँजावासीको प्रतीक्षाको घडी आजबाट समाप्त भएको छ,’ उनले बताए । 
एनटीसीको टावर आएपछि सिँजावासीहरूलाई सञ्चारको पहुँज सहज भएको छ ।
पहिला स्काईको टावर भएतापनि राम्रोसँग कुरा नबुझिने अनि फोन नै नलाग्ने र फोन गर्नका लागि घरबाहिर अग्लो डाँडामा जानु पर्ने अवस्था थियो ।
यो समस्या अहिले पूरै हटेको छ ।
