३१ असार २०८३, बुधबार
धनगढी– जिल्ला प्रशासन कार्यालय कैलालीले जन्म मिति नै उल्लेख नगरी नागरिकता जारी गरेको तथ्य फेला परेको छ ।
कैलाली प्रशासनले लेखपढ गर्न नजान्ने पूर्वकमैया समेत रहेका गौरीगंगा नगरपालिका–१० का करिब ७३ वर्षिय श्रीराम चौधरीलाई विना जन्म मितिको नागरिकता दिएको तथ्य फेला परेको हो ।
आफ्ना भाईले वृद्धभत्ता पाउन थालेपछि आफूले पनि बृद्ध भत्ताको लागि उमेर पुग्यो कि ? भनेर छिमेकीलाई नागरिकता हेर्न लगाएपछि मात्रै नागरिकतामा अाफ्नाे जन्म मिति नै उल्लेख नभएकाे थाहा पाएको चाैधरीले बताए । त्यस्तै गाउँमा विद्युत सेवा लिन पनि नागरिकता नै चाहिएपछि उनको विना जन्ममितिको नागरिकताको तथ्य वाहिर आएको हो ।
उनले विना जन्म मितिको नागरिकताकै कारण आफू वृद्धभत्तासहित अन्य सेवा सुबिधाबाट समेत बञ्चित हुँदै आएको दुखेसो सुनाए ।
‘म एउटा पूर्वकमैया हो । पढे लेखेको छैन । नागरिकताको प्रतिलिपी पाएपछि घर फर्के । उतिबेला काम पनि लागेन । म भन्दा कान्छो उमेरको भाईले बृद्ध भत्ता पाउन थालेपछि वडा कार्यालयमा गएर नागरिकता देखाउँदा थाहा पाए’, लोकान्तरलाई दुखेसो सुनाउँदै उनले भने, ‘१४ वर्ष कठरियाको घरमा, ६ वर्ष लिक्माका जमिनदारको घरमा र १ वर्ष ऐंठाको जमिनदारको घरमा कमैया बसे । कमैया मुक्तिपछि शिविरमा बस्दै आएको छु । नागरिकताको कारण मेरो घरमा अझैसम्म विद्युत जडान गर्न पाएको छैन ।’
उनी १४ वर्षको उमेर हुँदादेखि साविक उदासीपुर ८ लौसाका जमिनदार बेदम कठरियाको घरमा कमैया बसेका थिए । उनको नागरिकताको ठेगाना पनि साविक उदासीपुर–८ लौसा उल्लेख गरिएको छ भने उनको नारिकता कैलालीका तत्कालीन प्रमुख जिल्ला अधिकारी नन्दकुमार कार्कीले प्रमाणित गरेका छन् । प्रजिअ कार्की २०३६ मा कैलालीमा कार्यरत रहेको प्रशासनको तथ्यांकमा उल्लेख छ ।
नागरिकता च्यातिएपछि उनी जिल्ला प्रशासन कार्यालयबाट प्रतिलिपि निकालेका थिए । तर प्रतिलिपि लिने क्रममा यस्तो लापरबाही भएको पाइएको हो । उनले पाएको नागरिकताको दर्ता नं. १४२१ नम्बर भएपनि प्रशासनको रेकर्ड फाइल एंव कम्प्युटरमा समेत भेटिएको छैन । जुनकारण उनी थप समस्यामा परेका छन् ।
कैलालीका प्रमुख जिल्ला अधिकारी बाबुराम श्रेष्ठले नागरिकतामा गम्भीर त्रुटी भएको स्वीकार गर्दै चौधरीको नयाँ नागरिकताको लागि सम्बन्धित वडा कार्यालयलाई सिफारिस गर्न पत्रचार गरेको जानकारी दिए ।
साथै नागरिकता देखिने त्रुटी आगामी दिनमा नदोहोर्याउन मातहतका कर्मचारीलाई निर्देशन समेत दिएको प्रजिअ श्रेष्ठले बताए ।
