२३ असार २०८३, मंगलबार
बुटवल– वैदेशिक रोजगारमा जाने श्रमिकहरु अब श्रम स्वीकृतिका लागि काठमाडौं जानुपर्ने बाध्यता अन्त्य भएको छ ।
एक पटक विदेश गएर आएका मजदूरहरूको पुन श्रम स्वीकृति (रि–इन्ट्री) लागि मात्र लागि बुटवलबाट यो सेवा सुरू भएको हो । वैदेशिक रोजगारीबाट बिदामा आएर फेरि फर्केर त्यही कम्पनी र त्यहीँ देशमा जानेको लागि मात्र यो सेवा सुरू गरिएको छ । अहिले ठूलो चाप पनि यसैमा छ ।
प्रदेश नम्बर पाँचबाट वैदेशिक रोजगारमा जाने लक्षित गरी सामाजिक सुरक्षा मन्त्रालय श्रम तथा व्यवसायजन्य सुरक्षा विभाग श्रम तथा रोजगार कार्यालयले बुटवलबाट श्रम स्वीकृतिको सेवा सुरू गरेको हो । यस अगाडि श्रम स्वीकृति बैदेशिक विभाग काठमाडौंबाट मात्र हुन्थ्यो । सेवाको बैदेशिक रोजगार विभागका महानिर्देशक दिलिप कुमार चापागाईले उद्घाटन गरे । कार्यालय बुटवल–६ चाँदबारीमा स्थापना गरिएको हो ।
बैदेशिक रोजगारमा जाने कामदारको चाप धेरै भएर वैदेशिक रोजगार विभागमा चाप धेरै भएपछि सेवा विकेन्द्रित गरेको चापागाईले बताए । ‘तत्काल हामीले रि–इन्ट्रीको सेवा सहित प्रदेश नम्बर पाँचको बुटवल र प्रदेश नम्बर दुईका जानपुरबाट आइतबारदेखि सेवा सुरू गरेका छौं’ उनले थपे, ‘यसै आर्थिक वर्षभित्रै वैदेशिक रोजगारीका सबै सेवा प्रदेश मातहत ल्याउछौं÷दिन्छौं ।’
‘केही समयपछि श्रमको सबै काम पनि प्रदेश मातहतमा स्थापित हुने श्रम कार्यालयबाट हुनेछन् । सरकारले सातै वटा प्रदेशबाट यो सेवा दिने तयारी गरेको छ । पहिलो चरणमा प्रदेश पाँच र दुईबाट यो सेवा सुरू गरेको हो’ चापागाईले भने ।
वैदेशिक रोजगारीबाट विदामा आएकाहरु अब काठमाडौंमा बसिरहनु नपर्ने र सबै काम घरबाटै पूरा गर्न सकिने कार्यालय प्रमुख उमेश शर्माले बताए । बैदेशिक रोजगारीमा सबैभन्दा धेरै प्रदेश दुईका मजदूरहरु छन् भने, त्यसपछि प्रदेश एक र तेस्रोमा प्रदेश नम्बर पाँच पर्छ ।
बुटवल कार्यालयमा उपसचिव शर्माको नेतृत्वमा १८ जना कर्मचारीहरू खटाइएको छ । अहिले ४६ लाख मजदुरहरु वैदेशिक रोजगारमा छन् । जसमा ३ लाख महिला छन् ।
