१९ असार २०८३, शुक्रबार
काठमाडौं — ओलम्पिक आयोजनलाई थप प्रभावकारी र रंगीन बनाउनका लागि लगातार नयाँ खेल जोडिएका छन् । अब ब्रेक डान्सलाई पनि ओलम्पिक खेलमा समावेश गर्न सकिनेछ ।
पेरिसको स्थानीय ओलम्पिक समितिले बिहीवार यसको जानकारी दिएको हो । सन् २०२४ को ओलम्पिक पेरिसमा हुन लागेको छ ।
त्यसबाहेक स्केटबोर्डिङ, स्पोर्ट्स क्लाइम्बिङ र सर्फिङ जस्ता खेल थपिने प्रस्ताव आएका छन् ।
पेरिस ओलम्पिक आयोजनाका स्थानीय समिति प्रमुख टोनी एस्टनगुएटले यसको जानकारी दिएका हुन् । उनले भने, ‘ओलम्पिक खेलको आयोजनलाई थप कलात्मक बनाउनका लागि चार नयाँ खेल थपिएको छ । प्रभावकारी र आश्चर्यजनक बनाउने खेलहरू समावेश गर्ने हाम्रो कोशिश हो । पेरिस २०२४ को पहिचानलाई सही अर्थमा चिनाउने चार खेल संलग्न गर्नका लागि हामीले ओलम्पिक संघमा प्रस्ताव पठाएका छौं ।’
यी चार खेलमा प्रस्तावमाथि अन्तिम फैसला अन्तर्राष्ट्रिय ओलम्पिक संघले नै लिनेछ । विश्वका केही देशमा ब्रेकडान्सको निकै क्रेज छ र सन् २०१८ को युथ ओलम्पिकमा यसलाई खेलका रूपमा संलग्न गरिएको थियो ।
स्थानीय आयोजकहरूका अनुसार, चार नयाँ खेल समावेश गर्नका लागि स्थायी संरचना बनाउनुपर्ने आवश्यकता पनि छैन ।
एजेन्सी
