काठमाडौं, १५ चैत– सोमबारदेखि सुरु भएको एसीसी इमर्जिङ नेशन्स कप क्रिकेट प्रतियोगिताको दोस्रो खेलमा आयोजक बंगलादेशमाथि नेपाली बलर हावी भएका छन् ।
बंगलादेशको शेख कमल अन्तर्राष्ट्रिय क्रिकेट रंगशालामा नेपालले टस जितेर बलिङ रोज्दा बंगलादेशले ब्याटिङ गरिरहेको छ ।
३३ ओभरको खेल सकिँदासम्म बंगलादेशले ६ विकेट गुमाएर १४३ रनको योगफल तयार गरेको छ । खेलको सुरुवातमै नेपाली बलरहरुले बंगलादेशी ब्याट्सम्यानलाई पेभिलियन फर्काएका थिए । बंगलादेशका ओपन मोहम्मद सैफ हसन १० बलमा ७ रन बनाएर आउट भए भने अर्का ओपनर अजमिर अहमदले १ रन पनि बनाउन सकेनन् ।
बंगलादेशका लागि मोमिनुल हेक्युले अर्धशतकीय पारी खेल्दै ६१ रन बनाएर आउट भए । यस्तै नाजिर हुसैन पनि ५० रन बनाएर आउट भएका छन् । अन्य ब्याट्सम्यानहरुले भने खासै राम्रो प्रदर्शन गर्न सकेका छैनन् ।
नेपालका लागि अविनाश कर्ण एक्लैले ३ विकेट लिएका छन् । यस्तै सन्दिप लामिछानेले २ र मेहवुव आलमले १ विकेट लिए ।
