काठमाडौं— भारतको उत्तर प्रदेशका नयाँ मुख्यमन्त्री योगी आदित्यनाथका मुसलमान गुरुभाइ गुजरातमा बस्थे ।

गुजरातको विसनगरको नाथ सम्प्रदायको मठका महन्त गुलाबनाथ बापूको जन्म मुसलमान परिवारमा भएको थियो । जन्मँदा उनको नाम गुल मोहम्मद पठान थियो तर उनको पहिचान हिन्दू हार्डलाइनरका रूपमा छ । गुलाबनाथ र आदित्यनाथ गुरुभाइ हुन् ।

आदित्यनाथका गुरु अवैद्यनाथ नै गुलाबनाथका पनि गुरु हुन् । उनीहरूका बीच प्रगाढ सम्बन्ध छ ।

गुलाबनाथ बापूको सन् २०१६ मा निधन भएको थियो । आदित्यनाथ उनको अन्तिम संस्कारमा सामेल भएका थिए । अनि योगीले नै गुजरात मठमा नयाँ महन्तलाई पनि नियुक्त गरेका थिए ।

मठका नयाँ सञ्चालक शंकरनाथले बताए, ‘गुलाबनाथ बापू गुरु शिष्य परम्परामा छैठौं पिढीका थिए । गोरखनाथ मठका महन्त अवैद्यनाथ र योगी आदित्यनाथका साथसाथै नाथ सम्प्रदायसँग जोडिएका कारण गुलाबनाथ योगीसँग नजिक थिए । बापूले अवैद्यनाथलाई गुरु मान्थे र आदित्यनाथलाई गुरुभाइ ।’

गुलाबनाथ गोरखपुरमा हुने सबै ठूला कार्यक्रममा उपस्थित हुन्थे । गत वर्ष गुलाबनाथ गोरखपुर मठ पुग्दा योगी आदित्यनाथ र प्रधानमन्त्री नरेन्द्र मोदीले उनलाई सम्मानित पनि गरेका थिए ।

नवभारत टाइम्सबाट