काठमाडौं – लिपुलेक, कालापानी लगायत नेपाली भूभागलाई भारतले आफ्नो नक्सामा समेटेको विरोधमा पशुपति बहुमुखी क्याम्पस चाबहिलले विद्यार्थी सहितको विरोध र्‍याली निकालेको छ ।

नेपाल विद्यार्थी संघ काठमाडौं जिल्ला समितिको आयोजना तथा पशुपति क्याम्पसको संयोजनमा शुक्रवार विरोध प्रदर्शन गरेको हो ।

‘हाम्रो सीमा हाम्रो देश प्राणभन्दा प्यारो छ’ भन्ने नारासहित नेपालको एक चिम्टी भूभाग कसैले मिच्न नपाउने बताउँदै सरकारले कुटनीतिक रुपमा समस्याको समाधान गर्नुपर्ने विद्यार्थी नेता प्रेम शाहीले बताए ।

१ सय ५० जनाभन्दा बढी विद्यार्थीसहित मित्रपार्कबाट शुरू गरिएको विरोध र्‍याली चाबहिल चोकलाई परिक्रमा गरी पशुपति क्याम्पसमा आएर कोणसभामा परिणत भएको थियो । 

सभामा बोल्दै विद्यार्थी नेता राजकुमार तामाङले भारतले सार्वजनिक गरेको नक्सामा नेपाली भूमि अतिक्रमण भएकाले तत्काल नक्सा सच्चाउनुपर्ने माग राखे ।

विद्यार्थीले भारतीय विस्तारवाद र हेपाह प्रवृत्तिको विरोध जनाउँदै तत्काल नेपाल सरकारले कुटनीतिक कदम चाल्नुपर्ने बताएका थिए । ‘खराब छिमेकी चाहिँदैन, नेपाली भूमि मिच्न पाइँदैन, हाम्रो भूमि हाम्रो देश प्राणभन्दा प्यारो छ’ लगायत नारा लगाएका थिए ।

परराष्ट्रमन्त्री प्रदीपकुमार ज्ञवालीले कालापानी नेपालकै भएको बताएका छन् । नेपालको एक इन्च पनि सीमा मिच्न नदिइने भन्दै ज्ञवालीले भारतको नक्सामा नेपाली भूमि राखिएको हो भने त्यसलाई कूटनीतिक पहलबाट सुल्झाइने बताए ।

सरकारका प्रवक्ता सूचना तथा सञ्चारमन्त्री गोकुल बास्कोटाले भारतको नक्सामा नेपाली भूमि परेको सन्दर्भमा समस्या समाधानका लागि कूटनीतिक र राजनीतिक रुपमा पहल गर्ने बताएका छन् ।

भारतीय विदेशमन्त्रालयका प्रवक्ताले भने भारत सरकारले जारी गरेको नयाँ नक्सामा नेपालसँगको सीमा परिमार्जन नगरिएको बताएका छन् ।