२१ असार २०८३, आइतबार
माल्टामा पत्रकार ड्याफ्ने कारुआना गलिजियाको हत्याको अनुसन्धान पूरा नहुन्जेलसम्म आफू पदमा बस्ने प्रधानमन्त्री जोसेफ मस्कटले शुक्रवार बताएका छन् । रातभरि चलेको मन्त्रिपरिषद् बैठक बिहान ३ बजे सकिएपछि उनले यस्तो बयान दिएका हुन् ।
राजधानी भालेत्तामा प्रधानमन्त्री मस्कटले मन्त्रीहरूलाई आफ्नो कार्यालयमा बोलाएर योर्गेन फेनेचलाई राष्ट्रपतिका तर्फबाट क्षमादान दिने नदिने विषयमा छलफल गरेका छन् । फेनेचमाथि गलिजियाको हत्याको षड्यन्त्र रचेको आरोप छ र उनलाई अघिल्लो साता पक्राउ गरिएको छ ।
गलिजियालाई सन् २०१७ को अक्टोबर महिनामा हत्या गरिएको थियो ।
याट चढेर माल्टाबाट भाग्न खोजेका फेनेचलाई पक्राउ गरिएको हो । उनलाई हिरासतमा लिइएपछि उनले अन्य षड्यन्त्रकारीको सूचना दिने शर्तमा राष्ट्रपतिको क्षमादानको अनुरोध गरेका थिए ।
फेनेचलाई अभियोजनबाट उन्मुक्ति दिने कि नदिने भन्ने विषयमा निर्णय लिन मन्त्रीहरूलाई नै छोडेको मस्कटले बताए ।
उनीहरूले चाहिँ प्रहरी प्रमुख तथा महान्यायाधिवक्ताको सल्लाह अनुसरण गर्ने बताएको मस्कटले जानकारी दिए ।
गलिजिया माल्टाकी प्रख्यात खोज पत्रकार थिइन् र उनले मस्कट सरकारको आलोचना गरिरहन्थिन् । सन् २०१६ को फेब्रुअरी महिनामा उनले पनामा पेपर्समा खुलासा गरिएको सूचनाका आधारमा ऊर्जामन्त्री कोनराड मिज्जी तथा
मुख्यसचिव कीच शेम्ब्रीले पनामाका कम्पनीहरूबाट गोप्य रूपमा फाइदा लिएको छापेकी थिइन् ।
खबर छापेपछि उनी सत्ताको तारो बनिन् र उनको सुरक्षामा जोखिम आइलाग्यो । सन् २०१७ को अक्टोबर १६ मा उनको गाडीको सीटमुनि बम राखेर टाढाबाट पड्काइएको थियो ।
घटनापछि प्रधानमन्त्री मस्कटलाई निकै अप्ठ्यारो परेको भए पनि उनी समर्थकहरूमाझ लोकप्रिय छन् । त्यसैले उनी अहिलेसम्म शासन चलाउन सफल छन् । तर हत्यामा जिम्मेवार मानिसहरूको पहिचान गरेपछि आफूले सत्ता छोड्ने उनले फेरि एकपटक बताएका छन् ।
सत्तामा बसिरहने उनको निर्णयलाई विरोधकर्ताहरूले भने चर्को आलोचना गरेका छन् । उनीहरू प्रधानमन्त्री कार्यालयबाहिर क्याबिनेटको निर्णय कुरेर रातभरि बसेका थिए । मारिएका पत्रकार गलिजियाका छोरा पल मन्त्रीहरूमाथि गर्जिएका थिए ।
द गार्डियनबाट
