इरानका परराष्ट्रमन्त्री मोहम्मद जवाद जरिफले कुद्स फोर्सका प्रमुख कासिम सुलेमानीलाई अमेरिकाले गरेको हत्या अन्तर्राष्ट्रिय आतंकवाद संज्ञा दिएका छन् । अमेरिकाले देखाएको अराजक रोमाञ्चको दुष्परिणाम उसले भोग्नुपर्ने जरिफको चेतावनी छ । 

सुलेमानीको मृत्युका विषयमा एक वक्तव्य जारी गरेर इरानका सर्वोच्च नेता अली खमेनीले ‘उनको रगतले हात रंगाएका अपराधीहरूमाथि बदला लिइने’ चेतावनी दिए । हवाई आक्रमणले पश्चिम एसियामा शत्रुहरूविरुद्ध तेहरानको प्रतिकार झन् बढ्ने उनले प्रतिज्ञा गरे । 

रक्षामन्त्री अमिर हतामीले सुलेमानीको मृत्युको कठोर बदला लिने प्रतिबद्धता व्यक्त गरे । ‘यस हत्यामा संलग्न तथा यसका लागि जिम्मेवार सबैजनासँग हामी बदला लिनेछौं,’ उनले भने ।

बग्दाद अन्तर्राष्ट्रिय विमानस्थलनजिक बिहीवार अमेरिकी हवाई आक्रमणमा सुलेमानी र अनेकौं इराकी मिलिसिया नेताहरू मारिएका थिए । अन्य दुई इराकी कमान्डरहरूलाई यूएस मरिन्सले पक्राउ गरेको पनि बताइएको छ । पेन्टागनले हवाई आक्रमणको पुष्टि गर्दै ‘भविष्यमा इरानले गर्ने आक्रमणलाई निरस्त पार्ने लक्ष्यले’ ती आक्रमणहरू गरिएको जनायो । 

अमेरिकामा डेमोक्रेट सिनेटर क्रिस मर्फीले यस घटनापछि ‘विशाल क्षेत्रीय लडाइँ’ हुन सक्ने चेतावनी दिए । 

‘इरानले अमेरिका तथा हाम्रा साझेदारलाई आक्रमण गरिरहेमा निकै भारी मूल्य चुकाउनुपर्ने र त्यसक्रममा उनीहरूको तेल प्रशोधन केन्द्र पनि ध्वस्त हुनेछन्,’ रिपब्लिकन सिनेटर लिन्डसे ग्राहमले बताए ।

एजेन्सी