कोशी प्रदेशमा  नेकपा (माओवादी केन्द्र) र एकीकृत समाजवादीलाई सरकारबाट बाहिरिन नेकपा (एमाले)ले दबाब दिन थालेको छ । केन्द्रमा भागबन्डा हुँदा कोशीको नेतृत्व आफ्नो भागमा पर्ने भन्दै एमालेले नयाँ सरकार निर्माणको लागि गठबन्धनमा आबद्ध दलहरूमाथि दबाब बढाएको हो । 

कोशीमा एमालेले सरकारलाई दिएको समर्थन फिर्ता लिने तयारी गरेको छ । एमालेले मुख्यमन्त्री केदार कार्कीलाई दिएको समर्थन फिर्ता लिने तयारी गरेको एमालेका प्रमुख सचेतक रेवतिरमण भन्डारीले बताए । केन्द्रमा कोशी प्रदेश एमालेको भागमा पर्ने भएकोले अब नयाँ गठबन्धनअनुसार सरकार बन्ने उनले बताए । ‘केन्द्रमा प्रदेशको भागबन्डाको विषयमा लगभग टुंगिएको छ । आजभोलिमा लिखित सम्झौता हुने बुझेका छौं,’ उनले भने ‘हामी पनि अब दुई दिनभित्र प्रदेशका गठबन्धनका नेताहरू बसेर छलफल गरेर अगाडि बढ्छौं ।’ 

केन्द्रमा गठबन्धन परिवर्तन भए पनि माओवादी केन्द्र र एकीकृत समाजवादी भने सरकारमै छन् । उनीहरूले अहिलेसम्म सरकार छाडेका छैनन् । सरकारमा गएका मन्त्रीहरूलाई फिर्ता बोलाउने विषयमा पनि अहिलेसम्म कुनै छलफल नभएको नेताहरूले बताएका छन् । ‘केन्द्रमा बनेको समीकरणअनुसार हामी पहिला माओवादी र एसका मन्त्रीहरूलाई फिर्ता बोलाउन आग्रह गर्छौ,’ प्रमुख सचेतक भण्डारीले भने, ‘गठबन्धनका नेताहरूसँग छलफल गरेर हामी पनि समर्थन फिर्ता लिन्छौं ।’ एमाले संसदीय दलका उप नेता राम रानाले सरकारलाई दिएको समर्थन फिर्ताको कागज भने तयारी अवस्थामा राखेको बताए । सबै सांसदलाई हस्ताक्षर गराएर राखि सकिएको उनले बताए । 

एमालेले समर्थन फिर्ता लिएपछि र गठबन्धनमा रहेका दलहरूले मन्त्री फिर्ता लिएपछि मुख्यमन्त्री कार्कीले राजीनामा दिनुपर्ने र नदिए प्रदेशसभाबाट विश्वासको मत लिनुपर्ने एमालेको भनाइ छ ।

समर्थन फिर्ता लिएपछि राजीनामा नदिए संसद्को सर्वोच्चता प्रयोग गर्ने उनले बताए । गत असोज २७ गते नेकपा एमालेको समर्थनमा नेपाली कांग्रेसबाट ८ सांसद लिएर विद्रोह गरेका केदार मुख्यमन्त्री बनेका थिए । 

मुख्यमन्त्री कार्कीले कात्तिक १६ गते माओवादी केन्द्र र एकीकृत समाजवादीलाई सरकारमा सहभागी गराएपछि एमाले सरकारबाट बाहिरिएको थियो । 

संविधानको धारा १६८ को उपधारा ५ अनुसार मुख्यमन्त्री भएका कार्कीले भने आफ्नो सरकारको विकल्प नरहेको जिकिर गर्दै आएका छन् । उनले ‘केन्द्रमा पानी परे प्रदेशमा छाता नओड्ने’ उनले चेतावनी दिँदै आएका छन् । आफ्नो सरकार विघटन गराउन खोजे प्रदेश मध्यावधिमा जाने उनको चेतावनी छ । 

केन्द्रमा गठबन्धन फेरिँदैमा कोशीको सरकार नफेरिने उनले दाबी गर्दै आएका छन् । कोशीमा सहमतीय र सर्वदलीय सरकार निर्माणको विकल्प भने हुनसक्ने उनको भनाइ छ । 

सरकारमा सहभागी माओवादी केन्द्र र एकीकृत समाजवादीले भने ‘हतारो’ गर्ने पक्षमा देखिएका छैनन् । उनीहरूले सरकार बन्ने दर्बिलो आधार चाहिने बताउँदै आएका छन् । 

माओवादी केन्द्र संसदीय दलका नेता इन्द्रबहादुर आङ्बोले केदार कार्की नेतृत्वको सरकारबाट फिर्ता लिनेबारे पार्टीमा कुनै छलफल नभएको बताए । केन्द्रमा समीकरण बनेर हतारो गर्नुपर्ने अवस्था नरहेको उनले बताए ।

कोशीमा एमालेको ४०, कांग्रेसको २९, माओवादी केन्द्रको १३, राप्रपाको ६, नेकपा एकीकृत समाजवादीको ४ र जनता समाजवादी पार्टीको १ सांसद छन् । ९३ सदस्यीय प्रदेशसभामा बहुमत पुर्‍याएर सरकार गठन गर्न कम्तीमा ४७ सांसदको साथ आवश्यक पर्छ ।